Tólem qabilettilikterin rastaýy tıis 2005-2007 jyldarǵy Turǵyn úı baǵdarlamasy qatysýshylarynyń tizimi jarııalandy
ASTANA. 26 qazan. QazAqparat /Gúlmıra Alıakparova/ - Astana qalasynyń ákimdigi tólem qabilettikterin rastaýy tıis 2005-2007 jyldarǵy Memlekettik turǵyn úı baǵdarlamasy boıynsha komıssııanyń oń sheshimin alǵan adamdardyń tizimin jarııalady.
Ákimdiktiń www.astana.kz resmı saıtynda 2005-2007 jyldarǵy turǵyn úı baǵdarlamasyna qatysqan 177 adamnyń tizimi ornalastyryldy. Olar tólem qabilettikterin rastaý maqsatynda «Turǵyn úı qurylys jınaq banki» AQ-ǵa joldama alý úshin T.Bıgeldınov kóshesi, 74/1 meken-jaıy boıynsha ornalasqan Astana qalasynyń Turǵyn úı basqarmasyna kelýi tıis.
«Al tizimnen ózderin tappaǵan azamattarǵa atalmysh meken-jaı boıynsha kelýdiń qajeti joq», - dep naqtylady ákimdiktiń baspasóz qyzmeti.
Eske salaıyq, qala ákimdigi azamattardyń tizimderin turǵyn úı keshenderi iske qosylýyna qaraı jarııalap otyrady.
Qala basshysy Imanǵalı Tasmaǵambetovtyń aıtýynsha, 2005-2007 jyldarǵy Memlekettik baǵdarlama boıynsha salynyp jatqan turǵyn úıler 2011 jyldyń sońyna deıin tolyǵymen paıdalanýǵa beriledi. «Memlekettik komıssııa olardyń ázirligi týraly qol qoıǵannan keıin, turǵyn úı komıssııasy páterlerdi úlestirýge kirisedi», - dedi ol.
Salynyp jatqan nysandar týraly tolyq aqparatty ákimdiktiń saıtynan kórýge bolady. №1 shaǵyn aýdanyndaǵy №5-shi turǵyn úı kesheni №19-shy kósheniń oń jaq betkeıinde; memlekettik kommýnaldyq - ekinshi turǵyn úı «Stepnoı» garaj kooperatıvi aýmaǵynda boı kóterýde. Taǵy eki turǵyn úı kesheni Ońtústik-Shyǵys shaǵyn aýdanynda ornalasqan.
