Tólem qabilettigin rastamaǵan 2008-2010 jyldarǵy Turǵyn úı baǵdarlamasyna qatysýshylar páterlerin almaıdy
TANA. 18 qarasha. QazAqparat /Gúlmıra Alıakparova/ - Tólem qabilettigin rastamaǵan 2008-2010 jyldarǵy Turǵyn úı baǵdarlamasyna qatysýshylar páterlerin almaıdy. Bul týraly elorda ákimdiginiń resmı saıtynda habarlandy.
2009 jyly Astana qalasy ákimdigi janyndaǵy turǵyn úı komıssııasy 2008-2010 jyldarǵa arnalǵan Memlekettik turǵyn úı baǵdarlamasy aıasynda páterlerdi alatyn azamattardyń tizimin bekitti. Alaıda, atalmysh baǵdarlama qatysýshylarynyń deni «Turǵyn úı qurylys jınaq banki» AQ-ǵa joldama alýǵa kelgen joq jáne tólem qabilettikterin rastaıtyn anyqtamany usynbaǵan. 2008 jyldyń 19 shildesindegi QR Úkimetiniń №711-inshi qaýlysymen bekitilgen Turǵyn úıdi úlestirý erejesiniń 13-3 bóligine sáıkes, ótinish berýshi quzyrly organǵa óziniń tólemge qabilettigi týraly anyqtamany usynýy tıis.
«Osy rette, Astana qalasy ákimdiginiń janyndaǵy turǵyn úı komıssııasy 2008-2010 jyldarǵy Memturǵyn úı baǵdarlamasyna qatysýshylarǵa aǵymdaǵy jyldyń 30 qarashasyna deıin turǵyn úı komıssııasynyń jumys organy - Astana qalasynyń Turǵyn úı basqarmasyna kelý qajettigin aıtady. Eger tólemqabilettilikke teris baǵalaý berilgen jaǵdaıda nemese anyqtama ýaqytyly usynylmasa, turǵyn úı komıssııasy atalmysh Erejeniń 14-4 bóligine súıenip, 2008-2010 jyldarǵy Memturǵyn úı baǵdarlamasyna mundaı qatysýshylardy baspana alatyndardyń tiziminen shyǵarýǵa quqyly», - delingen taratylǵan habarlamada.
Turǵyn úı basqarmasyna dereý ýaqytta kelýi tıis azamattardyń tizimderi ákimdiktiń www.astana.kz saıtynda ornalastyryldy.
