Tólem balansynyń aǵymdaǵy shoty 5,9 mlrd dollar tapshylyqpen qalyptasty

NUR-SULTAN. QazAqparat – 2020 jyly tólem balansynyń aǵymdaǵy shoty 5,9 mlrd AQSh dollary tapshylyǵymen qalyptasty. Bul týraly búgin Úkimet otyrysynda QR Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.

«Aldyn ala derek boıynsha tólem balansynyń aǵymdaǵy shoty bizdiń boljamymyzǵa sáıkes kelip, 2020 jyly - 5,9 mlrd AQSh dollary tapshylyǵymen qalyptasty. Bul sheteldik ınvestorlarǵa tólenetin kiristiń qysqarýyna baılanysty 2019 jylǵy tapshylyqtan 1,3 mlrd AQSh dollaryna az», - dedi Ulttyq bank tóraǵasy.

Onyń aıtýynsha, aǵymdaǵy shot tapshylyǵynyń negizgi sebebi munaı jáne gaz kondensaty eksportynyń qysqarýy esebinen taýarlar eksportynyń tómendeýi bolyp otyr.

«Taýarlar ımportynyń tómendeýi birqalypty jáne ınvestıtsııalyq jáne aralyq taýarlardy ákelýdiń qysqarýyna baılanysty boldy»,- dedi Erbolat Dosaev.