Tólem balansyna qatysty ahýal jaqsaryp keledi - Ulttyq bank
Búgin palatanyń jalpy otyrysynda «QR Úkimeti men Esep komıtetiniń 2018 jylǵy respýblıkalyq bıýdjettiń atqarylýy týraly esepteri talqylanýda.
«Qazaqstan Ulttyq bankiniń aqsha-kredıt saıasaty ınflıatsııalyq targetteý rejıminde júrgiziledi. Ulttyq banktiń negizgi maqsaty baǵa turaqtylyǵyn qamtamasyz etý bolyp tabylady. 2018 jyly ınflıatsııa birtindep tómendep, 5-7 paıyz nysanaly dáliz ishinde qalyptasyp, jyl qorytyndysy boıynsha 5,3 paıyzdy qurady. 2019 jylǵy mamyrdyń qorytyndysy boıynsha jyldyq ınflıatsııa da 5,3 paıyz deńgeıde qalyptasty. Inflıatsııanyń turaqtanýy Ulttyq bankke bazalyq stavkany tómendetýge múmkindik berdi. 2018 jyly ol birtindep 10,25 paıyzdan 9,25 paıyzǵa deıin tómendetildi. Aǵymdaǵy jylǵy sáýirde ol 9 paıyzǵa deıin tómendetildi. Tutastaı alǵanda, aqsha-kredıt saıasatynyń sıpatyn ınflıatsııa boıynsha maqsattarǵa qol jetkizýge de, ornyqty ári ekonomıkanyń ınflıatsııasyz ósýine járdemdesýge yqpal etetin beıtarap ınflıatsııa retinde sıpattaýǵa bolady», - dep habarlady O. Smolıakov.
Ol teńgeniń erkin ózgermeli aıyrbastaý baǵamy valıýta saıasatyn júrgizý rejımi bolyp qalyp otyrǵanyn qosa aıtty.
«Baǵam munaı baǵasy jáne iri saýda áriptes elder valıýtalarynyń baǵamdary sııaqty irgeli faktorlardyń, sondaı-aq ishki faktorlar men maýsymdylyqtyń áserinen qalyptasýy múmkin», - dep túsindirdi UB basshysynyń orynbasary.
Sonymen birge, ol elimizdiń tólem balansyna qatysty ahýal jaqsarǵany týraly aıtty.
«Aǵymdaǵy shot 2 toqsan qatarynan profıtsıtpen qalyptasyp otyr. Máselen, aldyn ala baǵalaý boıynsha 2019 jylǵy 1-toqsanda aǵymdaǵy operatsııalar shotynyń profıtsıti saýda balansynyń 14,4%-ǵa, ıaǵnı 7,1 mlrd AQSh dollaryna deıin ulǵaıýy nátıjesinde 0,8 mlrd AQSh dollaryn qurady. Eldiń syrtqy boryshy tómendeýde», - dedi Smolıakov.
