Tólem balansyn aldyn ala esepteý boıynsha aǵymdaǵy operatsııalar shotynyń profıtsıti byltyr 4,5 ese ulǵaıdy

Aǵymdaǵy operatsııalar oń balansynyń aıtarlyqtaı ulǵaıýy energııa tasymaldaǵyshtardyń álemdik baǵalarynyń joǵary deńgeıi aıasynda taýar eksporty qunynyń ósirilýimen de qamtamasyz etildi. 2011 jyly ortasha alǵanda brent surypty munaıynyń álemdik baǵasy bir barreli úshin 110,9 dollardy qurady. Bul bazalyq kezeńdegi ortasha deńgeıden  (79,6 dollar.) 39,3%-ǵa joǵary. Bul rette munaıdyń edáýir joǵary baǵasy esepti kezeńniń 2-toqsanynda baıqaldy. Onda  1 barrel úshin 117,1 dollardy qurady. Ol 3-toqsanda 112,5 dollar, al 4-toqsanda  109,3 dollar boldy. Sonyń nátıjesinde, taýarlar eksporty 2010 jyldyń osyndaı kórsetkishimen salystyrǵanda 46,1%-ǵa ulǵaıyp, Ulttyq  bankiniń baǵalaýy boıynsha 88,9 mlrd. dollar boldy.

Taýarlar ımportynyń kólemi de 42,1 mlrd. dollardan asyp, 31,8%-ǵa ósti. Nátıjesinde, esepti kezeńdegi saýda balansy Ulttyq banktiń baǵalaýy boıynsha 46,8 mlrd. dollar (28,9 mlrd. doll. bolǵan bazalyq kezeńmen salystyrǵanda 61,9%-ǵa ósý) bolatyn oń saldomen qalyptasty.

Qyzmetter balansynyń defıtsıti aldyn ala baǵalaý boıynsha  14,3%-ǵa tómendep, 6,1 mlrd. dollardy qurady. Qyzmetterdiń teris teńgerimsizdiginiń qysqarýy bazalyq kezeńmen salystyrǵanda 7,4%-ǵa qysqarǵan qyzmetter ımportynyń azaıýymen qamtamasyz etildi.

Taýarlar eksportynan túsimderdiń ulǵaıýy saldarynan da ekonomıkanyń salalaryna sáıkes keletin sheteldik tikeleı ınvestorlardyń kiristeri ósýin jalǵastyrdy. Sheteldik tikeleı ınvestorlarǵa tólemder aldyn ala 24,1 mlrd. dollar  dep baǵalandy. Bul bazalyq kezeńniń osyndaı kórsetkishinen (16,2 mlrd. doll.) 48,9%-ǵa joǵary. Tikeleı ınvestıtsııalaý qatynastarymen baılanysty emes kredıtorlarǵa syıaqy tólemderi de esepti kezeńde 17,5%-ǵa ulǵaıa otyryp, 3,1 mlrd. dollardy qurady. Nátıjesinde, ınvestıtsııalyq kirister balansynyń teris saldosy aldyn ala baǵalaý boıynsha 25,2 mlrd. dollar boldy.