Tólebılik kelinshek baqshasyna kókónis ósirip, tabysqa kenelip otyr
TÓLEBI. QazAqparat – Túrkistan oblysy Tólebı aýdanynda turatyn Nurjamal Amangeldıeva baqshasynda kókónis ósirip, mol tabysqa kenelip otyr. Qaınar eldi mekeniniń turǵyny ári áıelder keńesiniń tóraıymy úı irgelik jerin tıimdi paıdalanyp, kásibin dóńgeletýde, dep habarlaıdy QazAqparat tilshisi.
Nurjamal Shajalyqyzy óziniń ozyq tájirıbesin aýyldyq okrýgtegi eldi meken turǵyndaryna taratý maqsatynda semınar-keńes ótkizdi. Sharanyń negizgi maqsaty - Alataý aýyldyq okrýgi turǵyndaryna jeke kásiptiń kez-kelgen túrimen aınalysyp, tabysqa jetýge jáne memleket tarapynan beriletin járdemaqyǵa muqtaj bolmaýdy túsindirý boldy.
Sharaǵa alys-jaqyn aýyldardan 100-ge jýyq qyz-kelinshek kelip qatysty. Olardyń qatarynda kópbalaly analar men áleýmettik az qamtylǵan otbasy músheleri bar. Eńbekqor kelinshek semınar barysynda óziniń gollandııalyq qııar jáne kókónis ósirý baǵytyndaǵy is-tájirıbelerin bólisip, turǵyndar tarapynan qoıylǵan suraqtarǵa keńinen jaýap berdi.
Aıta keteıik, ol nebári 0,36 ga úı irgelik jerinen 25 tonna gollandııalyq qııar men 1,5 tonna qyzanaq, 800 kg kartop jáne basqa da baqsha ónimderin jınap alǵan. Sóıtip daıyn ónimdi saýdaǵa shyǵaryp, otbasylyq kásippen aınalysýda.
