Tólebılik kásipker taý bókterine qulpynaı egip, tabysqa kenelip otyr

TÚRKІSTAN. QazAqparat – Túrkistan oblysynda tólebılik kásipker taý bókterine qulpynaı egýdi qolǵa aldy. Alǵabas eldi mekeniniń turǵyny Qanat Jıenbaev bos jatqan jerge jemistiń osy túrin egip, mol tabysqa kenelip otyr, dep habarlaıdy QazAqparat tilshisi.

Jeke kásipker 2015 jyldan beri bos jatqan 70 sottyq jeriniń 50 sottyǵyna tamshylatyp sýǵarý ádisin paıdalanyp, qulpynaı kóshetterin otyrǵyzǵan. Atalǵan sharýashylyqta qajettilikke qaraı 4 adamnan 12 adamǵa deıin jergilikti turǵyndardy jumyspen qamtyp, kúnine árqaısysyna 2200 teńgeden tóleýde.

Qanat Jıenbaevtyń sózinshe, maýsymyna 1 tonna kóleminde qulpynaı alady. Ónimderin mamyr, shilde jáne qyrkúıek aılarynda jınap, saýdalap júr. Dıqan aldaǵy ýaqytta eshbir dárilik qospasyz ónim alýdy josparlap otyr.

«Óz ónimderimdi bazarǵa shyǵaryp áýre bolmaı-aq, ózimizdiń Birinshi Mamyr, Zaǵambar, Yntymaq aýyldaryna 600 teńgeden satyp otyrmyn. «Jumys joq, aqsha joq» dep júrgen azamattardy osynda kelip, eńbektenýge shaqyrar edim. Sóıtip aýlasyndaǵy bos jatqan jerdi ıgiligine jaratyp jatsa, tabysy da turaqty bolar edi»,- deıdi kásipker.