Tólebıde sý shaıyp ketken kópirler bir táýlikte qalpyna keltirildi

TÓLEBI. QazAqparat - Tótenshe jaǵdaı jarııalanǵan Tólebı aýylyndaǵy Qasqasý eldi mekeninde ornalasqan 2 kópirdi tolyq sý shaıyp ketken, bir kópirge zaqym kelgen. Jergilikti mańyzy bar taǵy bir kópirdi sý shaıǵan. 4 kópirdi tolyq retke keltirý jumystary tynymsyz júrip jatyr, dep habarlaıdy QazAqparat oblys ákiminiń baspasóz qyzmetine silteme jasap.

Nátıjesinde eki ótkel tolyq retke keltirilip, aýyldar arasyndaǵy baılanys ashyldy. Jolaýshylar kóligi jáne avtomobıl joldary basqarmasynyń basshysy Rolan Ibragımovtiń málimdeýinshe, qaıta qalpyna keltirý jumystary qysqa merzimde júzege asady.

«Ortasha jóndeý jumystary tynymsyz júrgizilip jatyr. Qasqasý eldimekenindegi shaıylǵan qubyrlardy qalpyna keltirý maqsatynda tıisti tehnıka jumyldyrylyp, materıaldar jetkizildi. 4 kópirdiń ekeýi bir kúnde qalpyna keltirildi. Taǵy biri rettelip, jaıaý júrginshiler úshin ashyldy. Erteńge deıin aıaqtap, kólik júrý úshin ashamyz. Sońǵysyna qatysty jumystar qarjy máselesiniń sheshilýin talap etedi. Sondaı-aq bul jumysqa 20 tehnıka jáne 21 jumysshy jumyldyryldy», – dedi oblystyq jolaýshylar kóligi jáne avtomobıl joldary basqarmasynyń basshysy Rolan Ibragımov.

Sonymen qatar Tólebı aýdanynyń Qasqasý, Keńesaryq, Qosaǵash, Ekpindi, Birkólik, Kıelitas, Dostyq aýyldary men Leńgir qalasynyń aýmaǵynda ornalasqan eldi mekenderinde jańbyr sýy jınalǵan.

Jolaýshylar kóligi jáne avtomobıl joldary basqarmasynyń málimetinshe, atalǵan eldi mekenderden ótetin aýdandyq mańyzy bar joldar men aýyl kóshelerinen bólek, birqatar oblystyq mańyzy bar joldarǵa da zaqym kelgen.

Eske sala keteıik, Túrkistan oblysynyń Tólebı, Qazyǵurt, Báıdibek aýdandarynda nóser jaýynnan keıin sel júrip, úı aýlalary men kópirlerdi sý alyp ketken edi.