Tólebıde mal urlaǵandardy bosatý úshin 3 mln teńge talap etken podpolkovnık sottaldy

TÚRKІSTAN. QazAqparat - Túrkistan oblysynda mal urlap ustalǵandardy bosatýǵa áreket jasaǵan polıtseı úsh jylǵa sottalyp ketti. Tólebı aýdandyq polıtsııa bólimi bastyǵynyń burynǵy birinshi orynbasary qyzmetin asyra paıdalanyp, alaıaqtyq jasaǵany úshin bas bostandyǵynan aıyryldy, dep habarlaıdy QazAqparat tilshisi.

Tólebı aýdandyq sotynnyń dereginshe, laýazymdy tulǵa mal urlaǵan qos kúdiktiniń áreketin jabý úshin 3 mln teńge bopsalaǵan.

Alaıda bótenniń múlkin óziniń qyzmet babyn paıdalana otyryp ıemdengen polıtseı urlyq jasaǵandarǵa kómektese almaǵan.

Aıyptalýshy ómir boıyna memlekettik uıymdarda qyzmet ete almaıtyn boldy.

Ol sondaı-aq, podpolkovnık sheninen de aıryldy. Degenmen sot úkimi áli zańdy kúshine engen joq.

«Sottalýshynyń kinási jábirlenýshiler men kýálardyń sot talqylaýyndaǵy aıǵaqtarymen, tergeý áreketiniń hattamalarymen, jasyryn tergeý áreketteriniń nátıjesimen jáne zattaı dáleldemelermen dáleldengen. Sot úkimimen aıyptalýshy Qylmystyq kodekstiń 24-baby 3-bóligi, 190-baby 3-bóliginiń 1), 2) jáne 3) tarmaqtary boıynsha kináli dep tanyldy. Ol memlekettik qyzmette, memlekettik uıymdarda jáne kvazımemlekettik sektor sýbektilerinde laýazym atqarý quqyǵynan ómir boıyna aıyryldy jáne úsh jylǵa sottaldy» delingen sot úkiminde.