Tólebıde bilim mekemelerin qarjylandyrýǵa 10 mlrd 990 mln teńge bólindi
TÓLEBI. QazAqparat – Túrkistan oblysy Tólebı aýdanynda bilim salasy qyzmetkerleriniń «Bilim sapasy: Bilim mazmunyn jańartý jaǵdaıyndaǵy jańa tásilder» taqyrybynda tamyz keńesi ótti. Jıynda «Jańartylǵan bilim mazmunyn damytýdaǵy ınnovatsııa jáne tájirıbeler» ádistemelik kórmesi arqyly jańa kadr daıarlaý tehnologııasyn baıandaıtyn aqparattyq stendter kórsetilimi uıymdastyryldy, dep habarlaıdy QazAqparat tilshisi.
Keńeske aýdan ákimi Baýyrjan Omarbekov, aýdandyq máslıhattyń hatshysy Nurlan Qoıbaǵarov, oblystyq bilim berýdi damytý ortalyǵynyń dırektory Baqytjan Eshenqulov, aýdandyq bilim bóliminiń basshysy Roza Amanova, aýdandyq bilim berý mekemeleriniń dırektorlary men muǵalimderi jáne BAQ ókilderi qatysty.
Jıyn barysynda aýdandyq bilim bóliminiń basshysy Roza Sársenbekqyzy bilim salasynda atqarylyp jatqan jumystardy tolyq baıandap, aldaǵy ýaqytta atqarylatyn jumystardy sholyp, Qazaqstan Respýblıkasynyń bilim jáne ǵylym mınıstrligi orta bilim berýdegi oqý-tárbıe baǵdarlamaryna engizilgen jańalyqtardy aıtyp ótti. Onyń aıtýynsha bıylǵa 2019-2020 oqy jylynda jańartylǵan bilim berý mazmunyna 4,9,10 synyptar, al 11 synyptar kelesi oqý jylynda ótedi.
«Aýdandaǵy 67 mekteptiń 52-si - tıptik, 15-i - yńǵaılastyrylǵan bolsa, 3 aýysymdy jáne apatty mektepter joq. Bıyl M.Áýezov atyndaǵy jalpy orta mektebiniń 200 oryndyq qosymsha ǵımarat qurylysy aıaqtalyp, 1 qyrkúıekte paıdalanýǵa berý josparlanyp otyr. Sonymen qatar, Leńgir qalasyndaǵy №4 Q.Sátbaev atyndaǵy jáne Qasqasý jalpy orta mektepteriniń aǵymdaǵy jóndeý jumystary aıaqtalyp, paıdalanýǵa berildi. Kóksáıek eldi mekenindegi 100 oryndyq bastaýysh mektebiniń qurylysy bastalsa, Lengir qalasyndaǵy №1, №5 mektep gımnazııalary, Aqbastaý jalpy orta mektebiniń qosymsha qurylys jumystary men Q.Tynybekov atyndaǵy jalpy orta mektebiniń sport zaly keler jyly paıdalanýǵa beriletin bolady. Aýdan bıýdjeti 21 mlrd 452 mln teńgeni qurap, bilim mekemelerin qarjylandyrýǵa 10 mlrd 990 mln teńge, ıaǵnı 51,2% bólinip keledi»,- dedi bilim bóliminiń basshysy.
Jıynǵa qatysqan aýdan ákimi Baýyrjan Omarbekov sóz alyp, ulaǵatty ustazdardy jańa oqý jylynyń bastalýymen quttyqtap ótti. Qazirgi jahandaný dáýirinde sapaly bilim – qarqyndy damýdyń basty shartyna aınalyp, biz - qazirgi zamannyń jańasha talaptary men úrdisine árqashan saı bolý kerektigin, bilimi tereń, oıy ozyq urpaqty tárbıeleıtin muǵalimder qaýymyna zor jaýapkershilik júkteletindigin atap ótti.
Jıyn sońynda eńbegi sińgen birqatar ustazdarǵa alǵys hat tabystaldy.
