Tólebı aýdanynyń prokýrory jasóspirimderdiń saýaldaryna jaýap berdi

TÓLEBI. QazAqparat – Túrkistan oblysy, Tólebı aýdanynyń prokýrory Dáýlet Tlemisovtiń bastamasymen qurylǵan mobıldi top músheleri balalar men jasóspirimder arasyndaǵy quqyq buzýshylyqtyń aldyn alý maqsatynda kezdesýler ótkizýde, dep habarlaıdy QazAqparat tilshisi.

Aýdan prokýrory bastaǵan top músheleri Kóksáıek aýyldyq okrýginiń mádenıet úıinde Tólebı, Qazaqstan, Jeńis, H.Dýlatı jalpy orta mektepteriniń oqýshylarymen kezdesti. Basqosýda qoǵamdaǵy birqatar ózekti máseleler qozǵalyp, suraq – jaýap túrinde erkin pikir almasyldy. Oqýshylar kókeılerindegi suraqtaryna tuşymdy jaýaptar aldy. Sonymen qatar, aýdan prokýrory jastardy elimizdegi qoldanystaǵy zań talaptarymen, jasóspirimder arasyndaǵy quqyq buzýshylyqtyń jáne kámeletke tolmaǵandar arasyndaǵy qylmystyń ósýiniń barysymen tanystyryp ótti. Salaýatty ómir saltymen ómir súrýge shaqyrdy. Mobıldi toptyń osyndaı kezekti kezdesýi Q.Mamytov atyndaǵy jalpy orta bilim berý mektebinde de ótti. Dáýlet Tlemisov jasóspirimder arasyndaǵy qylmys pen sýıtsıdtiń zardaptaryn aıtyp, onyń aldyn alý joldaryn túsindirdi. Sonymen qatar, kámeletke tolmaǵan jasty qylmys jasaǵan nemese zańdy buzǵan jaǵdaıda qandaı jazalar kútiletindigi aıtyldy. Aýdan prokýrory oqýshylarǵa bos ýaqytyn tıimdi paıdalanyp, sporttyq úıirmelerge barýǵa keńes berdi.