Tólebı aýdanynyń ákimi «Bala daýysy-2019» baıqaýynyń jeńimpazyn qabyldady
TÓLEBI. QazAqparat – Túrkistan oblysy Tólebı aýdanynyń ákimi Baýyrjan Omarbekov «Bala daýysy-2019» baıqaýynyń jeńimpazyn qabyldady. Aýdan basshysy baıqaýǵa Túrkistan oblysynyń atynan qatysyp, gran-prıdi ıelengen Meırambek Shalqarbaıdy jeńisimen quttyqtady, dep habarlaıdy QazAqparat tilshisi.
Baýyrjan Omarbekov daryndy balanyń ustazymen jáne ata-anasymen de kezdesip, olarǵa alǵysyn bildirdi.
«Osyndaı daryndy balany tárbıelep shyqqandaryńyzǵa alǵys aıtamyn. Daıyndaǵan ustazyna, eńbegińiz elenip, shákirtterińiz bıik belesterdi baǵyndyryp, Qazaqstannyń atyn álemge tanyta bersin degim keledi»,- dedi aýdan ákimi.
Aıta keteıik, Meırambek Shalqarbaı buǵan deıin 2017 jyly aýdandyq «Aqbota» án-bı baıqaýynda І oryn, 2018 jyly respýblıkalyq «Balaýsa juldyzdar» óner baıqaýynda bas júldeni jeńip alǵan.
Sondaı-aq, «Kóktem gúli - áz Naýryz» respýblıkalyq óner baıqaýynyń «Estradalyq vokal» nomınatsııasy boıynsha bas júlde, «Qysqy áýen» halyqaralyq óner baıqaýynyń І oryn ıegeri atanǵan bolatyn.
Qazirgi tańda Tólebı aýdanyndaǵy orta mekteptiń 6-synyp oqýshysy. 4 jyldan beri oblystyq jastardyń ýaqytyn tıimdi uıymdastyrý ortalyǵynyń «Vokal» úıirmesiniń ustazy, halyqaralyq án baıqaýlarynyń laýreaty Dámeli Kerimbekovadan sabaq alyp, úzdiksiz bilimin jetildirip keledi.
Jalpy, Á.N.Nazarbaevanyń «Jandaný álemi» qory uıymdastyrǵan respýblıkalyq konkýrs bıyl 4-jyl qatarynan ótti. Oǵan elimizdiń ár óńirinen 5 myńnan asa úmitker qatysyp, úzdik dep tanylǵan 17 jetkinshek aqtyq márege joldama alǵan. Osy baıqaýda jeńimpaz atanǵan M.Shalqarbaı endi Tokıo qalasyndaǵy Dısneılend demalys ornyna sapar shegip, A.Musahodjaeva basqaratyn «Shabyt» qazaq ulttyq akademııasynda grantqa túse alady.
