Tólebı aýdanynyń ákimi aýyl turǵyndarynyń máselelerimen tanysty
TÓLEBI. QazAqparat – Túrkistan oblysy Tólebı aýdanynyń ákimi ári «Nur Otan» partııasy aýdandyq fılıalynyń tóraǵasy Baýyrjan Omarbekov Qaratóbe jáne Tasaryq aýyldyq okrýgterinde kóshpeli qoǵamdyq qabyldaý ótkizdi. Bul shara «Nur Otan» partııasy Tólebı aýdandyq fılıaly qoǵamdyq qabyldaý bólmesiniń jumys josparyna sáıkes júrgizildi, dep habarlaıdy QazAqparat tilshisi.
Qabyldaýǵa kelgen qaratóbelik turǵyndar ortalyq kóshelerdiń jaryqtanýy men aıaq joldar salý, polıtsııa men mal dárigeriniń qyzmetine qatysty máselelerin jetkizdi. Sondaı-aq, eldimekendi abattandyrý men tabıǵı gaz qubyryn tartý, elektr baǵanalarynyń tozýy men ınternet máselesin kóterdi. Al, Qostóbe eldi mekenindegi kópir qurylysy boıynsha shaǵymdaryn aıtty.
Sol sııaqty Tasaryq aýyldyq okrýginiń turǵyndary da oqýshylar tasymaly, Tash kanalynyń qazirgi jaǵdaıy, jol kedergisin ornatý, tabıǵı gaz máselesi týraly ótinishterin bildirdi.
Aýdan ákimi kóterilgen máselelerdi nazarǵa alyp, talap-ótinishterdiń tıisti sheshimin tabatynyn jetkizdi.
Aıta keteıik, kóshpeli qoǵamdyq qabyldaý shalǵaıdaǵy eldimekenderdegi turǵyndardyń muń-muqtajyna qulaq asý men olardyń kókeıde júrgen ótinishterin tyńdaý, sheshimin tappaǵan máselelerdiń oń sheshilýine yqpal etý maqsatynda uıymdastyryldy.
