Tólebı aýdanynyń ákimi aýyl turǵyndarynyń máseleleri talqylanǵan jıynǵa qatysty
TÓLEBI. QazAqparat – Túrkistan oblysy, Tólebı aýdanyna qarasty Alataý aýyldyq okrýginde aýyl turǵyndarynyń máseleleri talqylanǵan jıyn ótti.
Aýdan ákimi Baýyrjan Omarbekovtyń qatysýymen ótken jıynda eldi mekenderdi kógildir otynmen qamtý jáne úı irgelik jerlerdi tıimdi paıdalaný jaıy sóz boldy, dep habarlaıdy QazAqparat tilshisi.
Aýyl turǵyndarynyń qatysýymen ótken jıynda aýdan basshysy orynbasarlary men bólim basshylarynyń zerdeleý jumystarynyń nátıjesin tyńdady.
Baıandamashylardyń málimetinshe, okrýgte 63 demalys orny bar. Olardyń 13-i aýdanǵa tirkelmeı jumys jasaýda. Anyqtalǵan 25 kotedj ben saıajaılar turǵyn úı maqsatynda esepke alynyp, kásipkerlik nysandarynyń qataryna qosylmaı otyr. 9 qymyzhana tirkelip jumys jasasa, onyń 4-eýi turǵyn úı retinde tizimge engen. Úı irgelik jerlerin tıimdi paıdalanyp, kókónis daqyldaryn egip jatqan 921 úı bar. Alataý, Qosaǵash eldi mekenderindegi jol boılary kúl-qoqystardan tazartylmaǵan. Qaınar, Nysanbek, Jańaturmys eldi mekenderi turǵyndarynyń gazǵa qosylýy baıaý júrip jatyr.
Baýyrjan Omarbekov aıtylǵan taldaýlardan soń, okrýg turǵyndarynyń usynys-pikirlerin tyńdady. Birlesip atqarýǵa bolatyn jumystardy sóz etti. Onyń ishinde gazǵa qosylý boıynsha aýyldyq okrýg ákimdigi tarapynan túsindirme jumystaryn júrgizý jáne úı irgelik jerlerin tıimdi paıdalaný, okrýgtiń tazalyq jumystary ýaqytynda jasaý syndy máseleler bar.
