Tólebı aýdanyndaǵy selden zardap shekken otbasylar tamyzda jańa baspanaǵa kiredi
TÓLEBI. QazAqparat – Túrkistan oblysy, Tólebı aýdanynda selden zardap shekken otbasylarǵa jańa baspanalar tamyz aıynda beriledi dep josparlanyp otyr. Oblys ákimi Ómirzaq Shókeevtiń tapsyrmasyna sáıkes, búginde qurylysy qarqyndy júrip jatqan úılerdi salý jumystary aıaqtalýǵa jaqyn, dep habarlaıdy QazAqparat tilshisi.
Atalǵan baspanalardyń 17-si – Leńgir qalasynda, 2-i – Kıelitas, 22-si – Sultan-Rabat, 1-i – Yntymaq aýyldarynda salynýda. Qazirgi tańda 22 úıdiń shatyry jabylyp, terezesi ornatylǵan. Іshki elektr jelisin, jylý júıelerin júrgizý men ishki jáne syrtqy árleý jumystary júrip jatyr. Baspanalardyń jalpy aýmaǵy 2640 sharshy metrdi quraıdy. Úılerdiń qurylysyn 9 merdiger mekeme júrgizýde.
Aıta keteıik, Tólebı aýdanynda aǵymdaǵy jyldyń 13 mamyr kúni qatty jaýyn-shashyn saldarynan ózen arnalarynan asyp, birneshe úıdi sý basqan edi. 42 úı jaramsyz dep tanylǵan.
