Tólebı aýdanyndaǵy blokpostardan 2500-ge tarta kólik keri qaıtaryldy
TÓLEBI. QazAqparat – Túrkistan oblysyndaǵy tabıǵaty ásem Tólebı aýdanynda Birkólik, Qasqasý taý shatqaldarynda ornalasqan demalys oryndaryna baratyn joldarǵa blokpostar qoıyldy.
Qatań karantın talaptaryn saqtaýdy qamtamasyz etý maqsatynda qoıylǵan blokpostardan demalys kúnderi 2500-ge tarta kólik keri qaıtaryldy, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, demalýǵa kelýshi azamattardyń kóbi Shymkent qalasynyń turǵyndary ekeni anyqtaldy. Sonymen qatar, zańsyz jumys istep turǵan 17 demalys ornynyń qojaıyndaryna is-qujattar jınaqtalyp, ákimshilik hatttamalar toltyryldy. Sondaı-aq, sý jaǵalaýynda shomylyp júrgen jáne qaýipsizdik sharalaryn saqtamaǵan 37 azamatqa QR ÁQBtK-niń 364-babymen «Jalpy sý paıdalaný erejelerin buzý» boıynsha eskertý jasaldy.
Odan bólek, bılik ókilin qorlaǵan azamattarǵa da sharalar qoldanyldy. Máselen, Birkólik aýylyna kireberis jerdegi blokposta polıtseıler «Toıota» markaly avtokólikti toqtatyp, túsindirý jumystaryn júrgizgen. Alaıda kólik ishindegi eki jas jigit tártip saqshylaryn tyńdamastan, olardy jurttyń kózinshe balaǵattaǵan. Atalǵan jaıtqa baılanysty QR QK-niń 378-babymen «Bılik ókilin qorlaý» áreketi boıynsha qylmystyq is qozǵalǵan.
