Tólebı aýdanynda jomart júrekti azamattarǵa qurmet kórsetildi

Aýdan ákimi Baýyrjan Omarbekov týǵan ólkeni túletip, halyqtyń áleýmettik jaǵdaıyn jaqsartýǵa atsalysqan birneshe isker azamaty alǵys hattarmen marapattady, dep habarlaıdy QazAqparat tilshisi.

«Búgingi marapattaýdyń maqsaty halyqty, bıznes-qurylym ókilderin, metsenattar men demeýshilerdi kótermeleý jáne kishi Otanyn damytýǵa qatysýǵa azamattardyń belsendiliginiń úzdik tájirıbesin taratý, qaıyrymdylyq qyzmet jasaý ıdeıalaryn tanymal etý bolyp tabylady. Bul azamattar «Bolashaqqa baǵdar: rýhanı jańǵyrý» baǵdarlamalyq maqalasyndaǵy «Týǵan jer» jobasy aıasynda týyp-ósken aýyldarynda iri áleýmettik jobalardy iske asyryp, kópbalaly otbasylarǵa kómek qolyn sozyp keledi»,- dedi aýdan ákimi Baýyrjan Omarbekov.

Aıta keteıik, marapattalǵan jandardyń arasynda qaıyrymdylyq jasap júrgenderi de az emes. Solardyń biri zeınetker Ábden Baıanov, kásipkerler Mýhtazım Taırov, Madına Ermahanbetova, Hasymhan Ashırbaev, Ikramjan Salıbekov jáne Kıelitas aýyldyq okrýginiń Analar keńesiniń tóraıymy, zeınetker Aıdarkúl Rahıshova. Olar aýdannyń az qamtylǵan kópbalaly otbasylaryna azyq-túlik pen aıaq kıim, mektep formasy, jazdyq jáne qystyq kıimdermen, mektepke qajetti zattarmen qamtamasyz etýde. Sondaı-aq, eldi mekenderdi kórkeıtý, kógaldandyrý jumystaryna atsalysyp keledi.