Tólebı aýdanynda jańadan salynǵan emhanada jeti eldimeken turǵyndary emdeledi
TÚRKІSTAN. QazAqparat - Búgin Túrkistan oblysyna qarasty Tólebı aýdanynda jergilikti 20 myń turǵynǵa qyzmet etýge shaqtalǵan aýyldyq emhana el ıgiligine berildi, dep habarlaıdy QazAqparat tilshisi.
Birinshi Mamyr aýyldyq okrýgi turǵyndarynyń qýanyshymen bólisýge barǵan oblys əkimi Janseıit Túımebaev ǵımarattyń ishin aralap kórip, medıtsınalyq nysan ujymyn halyq deniniń saýlyǵy úshin aıanbaı qyzmet etýge shaqyrdy.
«Jańadan boı kótergen emhana denderińizdiń saý bolyp, emen-jarqyn ómir súrýlerińizge sebepshi bolsyn. Munan bólek, byltyr, 2018 jyly aýdanda modýldik konstrýktsııa ádisimen jobalyq quny 210 mln teńgeni quraıtyn 7 medıtsınalyq beket salyndy. Olar - Ońtústik, Joǵarǵy Qasqasý, Qorǵan, Áńgirata, Alshaly, Aqaıdar, Tóńkeris eldi mekenderindegi nysandar. Osynaý medıtsınalyq ǵımarattar aýdan halqynyń ıgiligine qyzmet ete bersin!», - dedi aımaq basshysy.
Aıta keteıik, Birinshi mamyr aýyldyq okrýgine Birinshi Mamyr, Taǵaına, Yntymaq, Alǵabas, Jańajol, Beınetkesh, Zaǵambar eldi mekenderi qaraıdy. Jańa nysan osynaý jeti aýyldaǵy 19 799 adamǵa bastapqy medıtsınalyq-sanıtarlyq kómek kórsetetin bolady. Munda bir aýysymda 100 adam kelip em qabyldaı alady. Sonymen birge, ǵımaratta 1 top dárigerlik jedel medıtsınalyq járdem kórsetý bólimi de ornalasqan.
Munan keıin, aımaq basshysy Dostyq aýyldyq okrýgine qarasty Aqaıdar-1 eldi mekenindegi modýldik konstrýktsııa ádisimen salynǵan medıtsınalyq tirektiń jumysymen tanysty. Ǵımarat 600-den astam turǵynǵa bastapqy medıtsınalyq-sanıtarlyq kómek kórsetedi.
Jalpy, Tólebı aýdanynda 54 densaýlyq saqtaý mekemesi jergilikti turǵyndarǵa qyzmet kórsetip keledi.
