Tólebı aýdanynda ulaǵatty ustazdarǵa arnalǵan saltanatty shara ótti
TÓLEBI. QazAqparat – Túrkistan oblysy, Tólebı aýdanynda ulaǵatty ustazdarǵa arnalǵan saltanatty shara ótti. Merekelik jıynǵa aýdan ákimi Baýyrjan Omarbekov pen ardager ustazdar, mektep ujymdary men aýdan turǵyndary qatysty, dep habarlaıdy QazAqparat tilshisi.
Ortalyq mádenıet úıinde uıymdastyrylǵan «Ustaz aty bıik ári máńgilik» atty sharada aýdan ákimi quttyqtaý sóz sóılep, jyly lebizin bildirdi. «Mamandyq ataýlynyń tóresi — ustazdyq. Bilim oshaǵynyń dúrsildegen júregi bolyp sanalatyn muǵalimge kórsetiler qurmet zor. Adam balasy óz damýynda jańany úırenip, ǵylymdy, bilimdi toqýmen keledi. Qaı kezeńde bolmasyn tálim men tárbıe berý - eń uly murat. Adam janyna osy asyldy darytýshy – Ustaz! Dana halqymyz «Ustazy jaqsynyń ustamy jaqsy» degendeı, bolashaqqa jol silteıtin muǵalimniń eńbegin laıyqty baǵalaý – óte mańyzdy mindet. Bala kóńilderińiz ər oqýshynyń jan dúnıesin nurlandyryp, júregine shapaǵat nuryn tóge bersin»,- dedi Baýyrjan Omarbekov. Aýdan basshysy sondaı-aq, bilim qazynasyna úles qosyp, urpaqtar zerdesine ǵylym men bilimniń dánin seýip júrgen ustazdar qaýymyna alǵys hattar men syı-syıapattar tabystady. Saltanatty is-sharada shákirtke bilim berý jolynda talmaı eńbek etken, bilim salasynyń damýyna óz úlesterin qosqan muǵalimder Bilim jáne ǵylym mınıstrliginiń «Y.Altynsarın» tós belgisimen, oblystyq máslıhattyń gramotasymen, aýdandyq máslıhattyń gramotasymen, oblystyq kásipodaqtyń jáne bilim bóliminiń alǵys hattarymen marapattaldy. Sondaı-aq, oblystyq, respýblıkalyq olımpıadalarda shákirtteri júldeli oryndardan kóringen ustazdarǵa da qurmet kórsetildi. Shara sońynda ustazdyq qyzmetke alǵash kirgen jas muǵalimderdiń ant qabyldaý rásimi ótip, kontserttik baǵdarlamaǵa ulasty.
