Tólebı aýdanynda týrıstik baǵyttardyń joldary jóndelýde
TÓLEBI. QazAqparat – Túrkistan oblysynda týrızm salasyn damytý úshin týrıstik nysandarǵa baratyn joldardyń jaǵdaıyn jaqsartý baǵytynda aýqymdy jumystar atqarylýda. Tabıǵaty ásem, demalys oryndary mol Tólebı aýdanynda týrıstik baǵyttardyń joldary jóndelip jatyr, dep habarlaıdy QazAqparat tilshisi.
Aýdanda sońǵy eki jylda Birinshi Mamyr-Jańajol eldi mekenderi arqyly «Saıram-Ógem» ulttyq parkine baratyn oblystyq mańyzy bar KH-112 avtomobıl jolynyń 11 shaqyrymy 15 jyldan soń alǵash ret ortasha jóndeýden ótip, paıdalanýǵa berildi. Oblystyq jolaýshylar kóligi jáne avtomobıl joldary basqarmasynyń tapsyrysy boıynsha merdiger mekeme jol negizin arnaıy tehnıkamen nyǵyzdaý (resaıklerleý) jumystaryn júrgizip, asfalt jabyndysyn tolyq jańartty.
Sonymen qatar, atalǵan joldyń boıynda ornalasqan Birinshi Mamyr jáne Jańajol eldi mekenderinde aıaqjoldar tóselip, dıodty jaryqtandyrý shamdary ornatyldy. Budan ózge, jol tańbalary men jaıaý júrginshi ótpeleri syzylyp, sý ótkizgish qubyrlary aýystyrylǵan. Sondaı-aq, qaýipti aımaqtarǵa kólikterdiń jyldamdyǵyn baıaýlatatyn jol kedergileri qoıylǵan.
Jóndeýden ótken jol ońtústik aýdandardan keletin demalýshylar men basqa da kólik júrgizýshileri úshin óte qolaıly jaǵdaı týǵyzyp otyr.
Bastysy, jol júrý ýaqyty birshama qysqarady. Mamandar osy baǵyttaǵy jol jóndeý jumystary aldaǵy kezde de jalǵasady dep otyr.
