Tólebı aýdanynda turatyn kelinshek 18 jyl azamattyq ala almaı kelgen
Jyldar boıy Qazaqstan respýblıkasynyń azamaty atana almaı júrgen áıel «Nur Otan» partııasy Tólebı aýdandyq fılıalynda ótken qoǵamdyq qabyldaýyna kelip, kómek suraǵan. Aıtýynsha, ol jıyrma jylǵa ýaqyttan beri tek ýaqytsha sheteldiktiń turý yhtııarhatymen júrip kelgen. Qazir tuńǵysh perzenti 15-te bolsa, eń kenjesi 6 jasta.
«Enemniń kózi kórmeıtindikten oǵan kútim jasaımyn. Osy sebepti ári-beri shyǵýym qıyn. Sol kisiniń jalǵyz zeınetaqysyna kún kóremiz. Kúıeýimniń naqty mamandyǵy, turaqty jumysy joq. Qaı jerden ýaqytsha qara jumys shyqsa, sonda baryp azyn-aýlaq nápaqa tabady», - deıdi Nadıra Asylova.
Oblystyq máslıhat depýtaty Ǵalymjan Elshibaımen kezdesýi barysynda ol óz taǵdyryn baıandap ótti. Halyq qalaýlysyna Qazaqstannyń azamattyǵyn alý úshin Nadıra kóp sabylǵanyn aıtqan. Jergilikti ishki ister organdarynyń qyzmetkerleri Ózbekstannyń elshiligine siltegen dep otyr. Ol jaqtaǵylar tıisti qujattardy jınaý qajettigin alǵa tartqan. Qysqasy, qansha árekettense de nátıje shyqpaǵan.
N.Asylovanyń aıtýynsha, azamattyǵy bolmaǵan soń 5 balasyna memleket tarapynan beriletin járdemniń barlyǵynan qaǵylǵan. Bul rette «Nur Otan» partııasy Tólebı aýdandyq fılıalynyń zańger-keńesshisi Janar Jumaǵulqyzy Qazaqstan Respýblıkasynyń azamattarymen keminde úsh jyl nekede turatyn adamnyń azamattyq alýǵa quqyly ekeni zańnamada kórsetilgenin jetkizdi. Sondyqtan bes perzenti bar kelinshekke máslıhat depýtaty men partııa ókilderi birlesken túrde kómektesetin boldy.
«Qazir osy máseleni jan-jaqty zertteýge kiristik. Aýdandyq ishki ister bóliminiń kóshi-qon qyzmetimen baılanysqa shyǵyp, ondaǵy qyzmetkerler járdem berýge daıyn ekenin bildirdi. Kóp jyldan beri azamattyq ala almaı kele jatqan áıeldiń sharýasy ońtaıly sheshilýine yqpal etip, baqylaýda ustaıtyn bolamyz»,- dedi depýtat Ǵalymjan Elshibaı.