Tólebı aýdanynda táýligine 100 tonna asfalt-beton óndiretin zaýyt iske qosylady
NUR-SULTAN. QazAqparat - Tólebı aýdanynda «Bıznestiń jol kartasy - 2020» baǵdarlamasy aıasynda birneshe jobany iske asyrý josparlanýda. Olardyń biri táýligine 100 tonna asfalt-beton ónimderin shyǵaratyn zaýyt qurylysy, dep habarlaıdy Túrkistan oblysy ákiminiń baspasóz qyzmeti.
Jalpy quny 120 mln. teńgelik «Birlik» JShS-nda jańa 20 jumys orny ashylady.
Sondaı-aq, quny 120 mln. teńgeni quraıtyn jylyna 1000 tonna broıler etin óndiretin «Shymkent qus» qus fermasy salynady. Atalǵan joba 2020 jylǵa qaraı iske qosylatyn bolady.
Aýdandaǵy kásipkerlik sýbektileriniń sany - 8 211, onyń ishinde 92,4 paıyzy belsendi jumys atqarýda. Aımaqta kásipkerlik salasynda jumys isteıtinder sany 16 072 adamǵa jetip, qosymsha 675 adam jumyspen qamtylǵan. Bıyl kásipkerlik salasynda 40,5 mlrd. teńgeniń ónimin óndirip, jumys isteıtinder sanyn 16 475 adamǵa jetkizý kózdelýde.
Tólebı aýdanynyń ónimderi alys-jaqyn shetelderge eksporttalýda. Máselen, «Gazpromneft-Bıtým Kazahstan» JShS-i ótken jyly 230 myń tonna bıtým shyǵaryp, onyń 148 myń tonnasyn Ózbekstan jáne Tájikstan elderine eksporttaǵan. «Astyq saýda» jáne «Aqqum astyq» JShS-i 36,3 myń tonna un ónimderin Ózbekstan men Aýǵanstan elderine eksporttasa, «Baǵdaýlet-1» JShS-i bastapqy 10 tonna maqsary maıyn Qytaı eline eksporttaǵan.
Budan ózge, aýdanǵa demalýshylardy keńinen tartý maqsatynda jalpy quny 400 mln. teńgeni quraıtyn «AISA», «Aqken» jáne «Asem Taý» demalys oryndary iske qosyldy. 2019 jyly Qasqasý aýyl okrýginen quny 500 mln. teńgege «SAIRAM SU resort» 100 oryndyq demalys orny men Qoǵaly aýyl okrýginde quny 100 mln. teńgege saýmal-saýyqtyrý keshenin ashylatyn bolady. Keshenniń sıymdylyǵy 50 oryndy quraıdy. Sondaı-aq, Alataý aýyl okrýginde quny 150 mln. teńgege «Tańsulý» demalys aımaǵynyń qurylysy, Kemeqalǵan aýyl okrýginde quny 150 mln teńgege «Alma-Taý» demalys aımaǵynan qosymsha qurylys nysandaryn salý jumystary júredi.
