Tólebı aýdanynda selden qıraǵan úılerdiń ornyna jańasy salynady
TÚRKІSTAN. QazAqparat – Túrkistan oblysy, Tólebı aýdanynda nóserli jaýyn saldarynan sý shaıǵan úılerdiń ornyna jańasy salynýda. Apatty dep tanylǵan 38 baspana tolyq súrilip, búginde 28 úıdiń irgetasy qalanǵan, dep habarlaıdy QazAqparat tilshisi.
Qaıta salynyp jatqan úılerdiń qurylysymen tótenshe jaǵdaıǵa qatysty qurylǵan komıssııanyń tóraǵasy, oblys ákiminiń orynbasary Meıirjan Myrzalıev tanysyp qaıtty. Ol merdigerlermen kezdesip, qurylystyń sapaly atqarylýy boıynsha birqatar tapsyrmalardy júktedi. Búginde bul aýmaqta qurylysshylar birneshe úıdiń qabyrǵasyn qalaýǵa kirisip ketken. Al, sý shaıǵan aýmaqta qurylys jumystaryn shilde aıyna deıin aıaqtaý josparlanýda. Bul jumystar aımaq basshysy Ómirzaq Shókeevtiń turaqty baqylaýynda.
Aıta keteıik, tolassyz jaýǵan nóser jaýynnyń saldarynan Tólebı aýdanyndaǵy ózenderdiń sý deńgeıi kóterilgen bolatyn. Nátıjesinde 6 eldi mekendegi 200-den astam turǵyn úılerdiń aýlasyna sý kirgen bolatyn. Tótenshe jaǵdaıdyń zardaptaryn joıý jumystary shuǵyl túrde qolǵa alynǵan. Sonyń arqasynda sý shaıǵan 4 kópirge eki táýliktiń ishinde ótkelder ornatylyp, 32 shaqyrym aryq-atyz tazartylǵan. 3,5 myń qappen aryq erneýleriniń deńgeıi kóterilip, 4,2 shaqyrym qashyrtqy qazyldy. Qazir aýdan turǵyndary úshin eshqandaı qaýip joq. Jergilikti deńdeıdegi tótenshe jaǵdaı saldarynan qıyndyqqa kez bolǵan turǵyndar kóp uzamaı baspanalaryna qaıta oralatyn bolady.
