Tólebı aýdanynda mekteptiń janynan salynǵan qosymsha ǵımarat paıdalanýǵa berildi

TÓLEBI. QazAqparat – Túrkistan oblysy, Tólebı aýdanynda Bilim kúni merekesine oraı mekteptiń janynan salynǵan qosymsha ǵımarat paıdalanýǵa berildi. Kıelitas eldi mekenindegi M.Áýezov atyndaǵy orta mekteptiń jańa oqý blogynyń ashylý saltanatyna aýdan ákimi Baýyrjan Omarbekov qatysyp, ustazdar men oqýshylardy jańa oqý jylymen quttyqtady, dep habarlaıdy QazAqparat tilshisi.

«Jańadan salynǵan 200 oryndyq qosymsha ǵımaratta mekteptiń ashanasy men sheberhanasy, kitaphanasy men akt zaly bar. Sondaı-aq sáýletti sport zalda oqýshylar jene shynyqtyrý sabaǵyn ótýine jaǵdaı jasalǵan. Oqýshylarǵa árqashan tynymsyz izdeniste, qaı kezde de bilim alyp, erinbeı eńbektenip, tek jaqsy jetistikterińmen, joǵarǵy kórsetkishterińmen qýanta berińder»,- dedi aýdan ákimi. Aıta keteıik, aýdanda birneshe mektep kezeń-kezeńimen jóndeýden ótip jatyr. Mundaı jumystar Lengir qalasyndaǵy №4 Q.Sátbaev atyndaǵy mektepte júrgizildi. Sonymen qatar, Qasqasý jalpy orta mektepteriniń aǵymdaǵy jóndeý jumystary aıaqtalyp, paıdalanýǵa berildi. Kóksáıek eldi mekenindegi 100 oryndyq bastaýysh mektebiniń qurylysy bastalsa, qaladaǵy №1, №5 mektep gımnazııalary, Aqbastaý jalpy orta mektebiniń qosymsha qurylys jumystary men Q.Tynybekov atyndaǵy jalpy orta mektebiniń sport zaly keler jyly paıdalanýǵa beriletin bolady.