Tólebı aýdanynda mektepterdiń jylytý maýsymyna daıyndyǵy pysyqtaldy
TÓLEBI. QazAqparat – Túrkistan oblysy, Tólebı aýdanynda mektepterdiń jylytý maýsymyna daıyndyǵyn talqylanǵan jıyn ótti.
Aýdan ákimi Baýyrjan Omarbekovtyń tóraǵalyǵymen ótken jıynǵa aýdan ákiminiń orynbasarlary, qala, aýyldyq okrýg ákimderi, tıisti derbes bólim basshylary, mektep dırektorlary qatysty, dep habarlaıdy QazAqparat tilshisi.
Basqosýda aýdandyq taýarlar men kórsetiletin qyzmetterdiń sapasy men qaýipsizdigin baqylaý basqarmasynyń basshysy Aqerke Erkinbekova sóz alyp, aýdan aýmaǵynda ornalasqan mektepterdegi aýyzsý júıesiniń jaǵdaıyn baıandady. Synyptardaǵy jıhazdar men jaryqshamdardyń normaǵa saı kelýi jáne sport alańshalarynyń qorshaýlaryna qatysty máselelerdi aıtyp, birqatar usynysyn jetkizdi.
Jıyn barysynda Baýyrjan Omarbekov aıtylǵan máselelerdi nazarǵa alyp, mektepterdiń sanıtarlyq-epıdemıologııalyq jaǵdaıyn jaqsartý boıynsha mektep dırektorlaryna naqty tapsyrmalar berdi. Sonymen qatar, mektepterdegi, balabaqshadaǵy qaýipsizdikti, keleńsiz jaǵdaılardy aldyn-alý sharalaryn jasaýda qala, aýyldyq okrýg ákimderi tikeleı jaýapty ekenin atap ótti.
Aıta keteıik, ótken oqý jylynda aýdanda 67 mektep bar bolsa, onda 25 900-den astam oqýshy bilim aldy. Jańa oqý jylynda jańa mektepter salynyp, bilim uıalarynyń qatary tolyqty. Birqatarynyń qurylysy áli de júrgizilip jatyr.
