Tólebı aýdanynda aýyl sharýashylyǵy óniminiń jalpy kólemi 28 mlrd teńgeni quraǵan
TÓLEBI. QazAqparat – Túrkistan oblysy Tólebı aýdanynda bıyl aýyl sharýashylyǵy óniminiń jalpy kólemi 28 mlrd 924,2 mln teńgeni quraǵan. Al jyldyq jospar boıynsha 32 mlrd 788 myń teńgeniń ónimin óndirý mejelenip otyr, dep habarlaıdy QazAqparat tilshisi.
Aýdan ákimdiginiń málimetinshe, egin sharýashylyǵy boıynsha atqarylǵan jumystardyń nátıjesinde aýdanda bıylǵy jyly naqty egis kólemi 65901,3 gektarǵa jetken. Bul ótken jyldyń tıisti kezeńimen salystyrǵanda 1309 ga artyq.
Al, qarqyndy jemis-jıdek egý mejesi 175 ga oryndalǵan. Onyń ishinde qarqyndy júzim 6 gektarǵa, jańǵaq 42 gektarǵa egilgen. Tamshylatyp sýǵarý ádisi boıynsha aýdanda egis kólemi bıyl 500 gektarǵa jetken. Sondaı-aq, qosymsha 3 ga jerge jylyjaı salynǵan.
Sońǵy 5 jyldyń kóleminde oblys deńgeıinde Tólebı aýdany astyq jáne maıly daqyl óndirý baǵytynda 1-2 oryndardan kórinip keledi. Astyq jáne maıly daqyldardyń kólemi ótken jyldarǵa qaraǵanda artyǵymen jınalyp otyr. 
Mal sharýashylyǵy boıynsha aǵymdaǵy jyldyń qyrkúıek aıynda ótken jyldyń tıisti kezeńimen salystyrǵanda ІQM 67,0 myń bas, usaq mal 194,8 myń bas, jylqy 30,8 myń bas, qus 264,4 myń basty quraǵan. 
Ótken jyldyń kezeńimen salystyrǵanda et 11,0 myń tonnaǵa, sút 55,7 myń tonnaǵa, jumyrtqa 13,8 mln danaǵa jetken. Aýdanda qymyz óndirý salasynyń damýyna baılanysty qoı basy sońǵy 4 jylda kemip, jylqy 8500 basqa artqan bolatyn. Sol sebepti 2018 jyly memlekettik qoldaý sharalary 48 sharýashylyqqa kórsetilip, 716,8 tonna qymyz óndirgeni úshin 78,8 mln teńge sýbsıdııaǵa qol jetkizgen. Al, aǵymdaǵy jyly qosymsha 6 sharýashylyq qosylyp, 54 sharýashylyqqa ulǵaıǵan. Qazirgi tańǵa 888,3 tonna qymyz óndirgeni úshin 53,3 mln teńge (sýbsıdııalaý baǵasy 110 teńgeden 60 teńgege tómendeýinen) memlekettik qoldaý sharalary kórsetilýde.
