Tólebı aýdanynda abattandyrý jumysy qarqyndy júrgizilýde
TÓLEBI. QazAqparat – Túrkistan oblysy, Tólebı aýdanynda abattandyrý jumystary qarqyndy júrgizilýde. Jańasha keıipke engen aýdannyń ortalyq alańynda sýburqaq, shaǵyn demalys oryndyqtary jáne túngi jaryq shamdar ornatylǵan, dep habarlaıdy QazAqparat tilshisi.
Sondaı-aq, qalada oryn alyp jatqan jańalyqtardy kórsetý úshin Lengir qalasy ákimdigi ǵımaratynyń mańynda «LED» ekran iske qosyldy. Mundaǵy oryndyqtarda uıaly telefondardy qýattaýǵa da múmkindikter jasalǵan. Jalpy, aýdan turǵyndaryna arnalǵan demalys oryndaryn kóbeıtý jumystary toqtamaq emes. Aǵymdaǵy jyly Lengir qalasynyń Tólebı jáne Qapal batyr kósheleriniń qıylysyndaǵy 12,7 gektar shatqaldy abbattandyrý josparlanyp otyr. Munda 1200 túp aǵash otyrǵyzylyp, 3 sýburqaǵy, oryndyqtar, jolaıaqtar, shamdar ornatylatyn bolady.
Sonymen qatar, 6 shaqyrymǵa sozylyp jatqan Tólebı kóshesine, 3,3 shaqyrymdyq Á.Bektaev kóshesine ortasha jáne Lengir qalasyndaǵy jalpy 13,7 shaqyrymdy quraıtyn 12 kósheniń jolyna jóndeý jumystary júrgizilmek. Aýdan ákimi Baýyrjan Omarbekovtiń uıymdastyrýymen respýblıkalyq «Birge – Taza Qazaqstan!» atty ekologııalyq aktsııasy da aýdanda óz jalǵasyn tapty.
Atap aıtqanda, búgin Alataý aýyldyq okrýgindegi Birkólik – Aqmeshit ózenderiniń qıylysynan tańǵy saǵat 8.00-de bastaý alǵan senbilikke aýdan ákimdigine qarasty bólimder men mekemelerdiń qyzmetkerleri, sala mamandary, aýdandyq máslıhattyń depýtattary, etno-mádenı ortalyqtar,turǵyndar men jastar atsalysty. Olar árqaısysy óz mekemesine qarasty ózen boılary men jer ýchaskesin tazalap, jınalǵan qoqystardy bir jerge úıip qoıdy. Sóıtip, arnaıy júrgen júk mashınasyna artyp jiberdi. Ekologııalyq aktsııaǵa myńnann astam adam qatysyp, 4 tehnıka jumyldyryldy. Senbilik nátıjesinde 25 tonna qoqys shyǵaryldy.
