Tólebı aýdanyna kómekke kelgen azamattar sel zardaptaryn joıýda
TÓLEBI. QazAqparat – Túrkistan oblysy, Tólebı aýdanynda óńir basshysy Ómirzaq Shókeevtiń tapsyrmasymen sel saldaryn joıý jumystary 4 sektorǵa bólingen bolatyn. Búginde ár aýdannan kelgen azamattar ózderine bólingen sektordy retke keltirip, sý kirgen úılerdiń aýlasyn tazartýda, habarlaıdy QazAqparat tilshisi.
Máselen, Ordabasy aýdanyna bólingen Sultan Rabat eldi mekenin zerdeleý barysynda 55 úıdiń aýlasyna sý kirgeni anyqtaldy. Sondaı-aq, 17 baspananyń jertóleleri men qorajaılaryna jınalǵan sý, 35 úıdiń aýlalaryna kirgen laı men qoqys shyǵaryldy. 400 metr aryq joldary aǵash-butalardan tazartylyp, arnasy keńeıtildi. Kóshe jıegindegi shópter orylyp, 2 aıaldama men 500 metr bordıýrlerge syrlaý jumystary júrgizilýde. Oryn alǵan jaǵdaıdy retke keltirý maqsatynda 55 adam 17 tehnıkamen jumys júrgizýde. Al, Saıram aýdanyna bólingen Sultan Rabat eldi mekeninde 375 úıdiń aýlasyna sý kirgeni anyqtalǵan. Kórshi aýdannyń azamattary 35 turǵyn úıdiń aýlalary men jertólelerinen 1740 tekshe metr sý shyǵaryp, 48 úıdiń aýlalaryna kirgen laı men qoqysty jáne aryq joldaryn tazartqan. Oryn alǵan jaǵdaıdy retke keltirý maqsatynda 35 adam jumyldyrylyp, 2 motopompa men 6 tehnıkany pıdalanǵan.
Aıta keteıik, tolassyz jaýǵan jańbyrdyń saldarynan kelgen zardaptardy joıý men retke keltirý jumystaryna 400-ge tarta qyzmetker tartylǵan. Lengir qalasyndaǵy «Lengerka» ózeniniń qoqystan tazartý jumystaryna aýdandyq máslıhat depýtattary men qoǵamdyq keńes músheleri de belsene atsalysyp, óz úlesterin qosýda. Sonymen qatar, taýly aýdandaǵy sý tasqynyna oraı jarııalanǵan tótenshe jaǵdaıǵa baılanysty tólebılikterge qoldaý bildirý úshin arnaıy qor ashyldy. «Túrkistan» korporatıvtik áleýmettik damý qory arqyly kez kelgen azamat qaıyrymdylyq kómek kórsete alatyn bolady.
