Tólebı aýdany ákiminiń orynbasaryn tapsyryspen óltirmek bolǵan - prokýror
TÚRKІSTAN. QazAqparat - Búgin Túrkistan oblysy, Tólebı aýdany ákiminiń orynbasary Rabıǵa Beısebaevaǵa oq atqandarǵa qatysty sot bastaldy, dep habarlaıdy QazAqparat tilshisi.
Prokýror Almas Saǵyndyqovtyń sózinshe, sheneýniktiń tanysy Serik Bektanov bas arazdyǵyna baılanysty Rabıǵa Beısebaevadan kek almaq bolǵan. Sóıtip Jambyl oblysynyń turǵyny Ádilet Tórebekovke xabarlasyp, tapsyrys bergen. Ol úshin 1 mln 300 myń teńge berýge ýaǵdalasqan. Osydan keıin Tórebekov, Tazabekov jáne Amalbaevtar bul tapsyrysty oryndaýǵa oqtalǵan. Alaıda alǵash ret aram oılaryn júzege asyra almaıdy. Ekinshi ret taǵy baryp, úsheýi aýdan ákimi orynbasarynyń úıiniń mańyna kelip, ony óltirmek bolady.
«Tórebekov jerden tas alyp, Beısebaeva men júrgizýshisi Bıbolovqa qaraı laqtyrǵan. Beısebaevaǵa qaraı kóshe boıynda úsh ret tapanshamen oq atqan. Ózderi oqıǵa ornynan boı tasalaǵan. Saldarynan jeńil dene jaraqatyn alǵan Rabıǵa Beısebaeva Leńgir qalalyq aýrýxanasyna túsken»,-dedi prokýror Almas Saǵyndyqov.
Osydan keıin tapsyrys berýshi úsh kúdiktige qolma-qol aqshalaryn bergen. Sotta tapsyrys berýshi Alıhan Amalbaevqa Qylmystyq kodekstiń 28-baby 3-bóligimen («Qylmystyq quqyq buzýshylyqqa sybaılas qatysýshylardyń túrleri»), 293 babynyń 3 bóligi 2 tarmaǵymen («Buzaqylyq, atys qarýyn, gazdy qarýdy, pyshaqtardy, kastetterdi jáne ózge de sýyq qarýdy ne densaýlyqqa zııan keltirý úshin arnaıy laıyqtalǵan basqa da zattardy qoldanyp nemese qoldanýǵa tyrysyp jasalǵan is-áreketter»), Bektanovqa Qylmystyq kodekstiń 287-baby 4- tarmaǵymen («Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý»), 28-baby 5-bóligimen, 293-babynyń 3-bóligi 2-tarmaǵymen aıyp taǵyldy. Al, Tórebekov pen Tazabekov Qylmystyq kodekstiń 287 baby 4 tarmaǵymen jáne 293-babynyń 3-bóligi 2-tarmaǵymen aıyptalýda.
Eske salaıyq, ótken jyldyń qazan aıynda Tólebı aýdany ákiminiń orynbasary Rabıǵa Beısebaevaǵa belgisiz bireýler shabýyl jasap, óltirýge árekettengen bolatyn. Túski úzilis kezinde qyzmettik kóligimen úıine kelgen sátte úsh tulǵa oǵan qaraı birneshe ret oq atqan edi. Sheneýnik eńkeıip qalyp, kóliginiń esigin qulyptap úlgeredi. Osy kezde shýdy estigen kórshiler jınalyp, seziktiler qashyp ketken. Osylaısha aýdan ákiminiń orynbasary aman qalǵan bolatyn. Atalǵan oqıǵadan keıin óńirdiń tártip saqshylary osy qylmysqa qatysy bar degen kúdiktilerdi ustaǵanyn habarlaǵan.
