Tólebı aýdanynda ınvestıtsııalyq jobalar esebinen myńnan astam adam jumyspen qamtylady
TÚRKІSTAN. KAZNFORM - Búgin Túrkistan oblysy ákimdiginde Tólebı aýdanynyń 2030 jylǵa deıingi damý strategııasyn bekitý máselesi qaraldy.
Jıynda Tólebı aýdany ákiminiń mindetin atqarýshy Serjan Dúısebaev damý josparyn tanystyrdy.
Jalpy óńirlik ónimniń kólemi byltyr 145 mlrd. teńge bolsa, bıyl 149,8 mlrd. teńgege jetkizý josparlanǵan. Tıisti jumystar arqyly 2030 jylǵa qaraı jalpy óńirlik ónim 369 mlrd. teńgege jetedi dep josparlanyp otyr. ıAǵnı, ónerkásip ónimi kólemin 49 mlrd. teńgeden 115 mlrd. teńgege deıin, qurylystyń kólemin 10 mlrd. teńgeden 15 mlrd. teńgege, saýda kólemin 28 mlrd. teńgeden 84 mlrd. teńgege, aýyl sharýashylyǵy óniminiń kólemin 62 mlrd. teńgeden 154 mlrd. teńgege deıin jetkizý josparlanyp otyr. 2030 jylǵa deıin ónerkásip 2,3 esege, aýyl sharýashylyǵy 2,5 esege, qurylys 1,5 esege, saýda 2,9 esege, týrızm salasyndaǵy kórsetkishter 3,7 esege artpaq.
2025-2030 jyldar aralyǵynda quny 144 mlrd. teńge bolatyn 73 jobany iske asyryp, 1193 adamdy jumyspen qamtamasyz etý mejesi qoıylǵan. Investıtsııalyq jobalar negizinen ónerkásip, aýyl sharýashylyǵy, týrızm, saýda salalarynda júzege asyrylady. Ónerkásip salasynda quny 38,2 mlrd. teńge bolatyn 12 jobany iske asyrý josparlanǵan. Nátıjesinde 392 adam jumyspen qamtylmaq. Aýyl sharýashylyǵy salasynda quny 22,3 mlrd. teńge bolatyn 20 jobany iske asyryp, 268 adamdy jumyspen qamtý mejelengen. 2030 jylǵa qaraı aýyl sharýashylyǵynyń ónim kólemi 154 mlrd. teńgege nemese 2,5 esege artady. Sút fermalary, mal bordaqylaý alańdary ashylyp, balyq sharýashylyǵy, jylyjaı, baý-baqsha, tamshylatyp, jańbyrlatyp sýarý, ónim saqtaý qoımasy, et óńdeıtin tsehtar, qus sharýashylyǵy jáne jemis-jıdek ósirý tsehy jobalaryn júzege asyrý kózdelgen. 2024 - 2030 jyldary týrızmdi damytý úshin jalpy quny 78,1 mlrd. teńge bolatyn 23 jobany iske asyrý kózdelip otyr. Jańa týrıstik jáne demalys oryndary ashylady. Jobalar iske asqan jaǵdaıda týrıstik aımaqtyń áleýeti artyp, týrıster sany 3,7 esege artady dep boljanýda.
Túrkistan oblysynyń ákimi Darhan Satybaldy aýdannyń múmkindigi tolyq paıdalanylmaı otyrǵanyn aıtyp, atalǵan qujatty jetildire túsýdi tapsyrdy.
«Tólebı aýdany týrızm salasy boıynsha birinshi orynda turýy kerek. Oǵan barlyq jaǵdaı bar deýge bolady. Sulý tabıǵaty men taza aýasy bar, kórikti oryndary jetkilikti. Osy baǵyttaǵy jumysty kúsheıtińizder. Aýdan megapolıske jaqyn ornalasqan. Óndiristi, saýdany damytýǵa da qolaıly. Jumysty júıeleńizder. Kásipkerlikti damytyp, ınvestıtsııalyq jobalardy júzege asyrý qajet», – dedi Darhan Satybaldy.
Osyǵan deıin Túrkistan oblysyndaǵy kolledjder jumysshy mamandyqtaryn daıarlaýǵa basymdyq beretini týraly jazdyq.
