Tólebı aýdandyq aýrýhanasyna 10 dana ottegi kontsentratory jetkizildi
TÓLEBI. QazAqparat – Túrkistan oblysy, Tólebı aýdandyq aýrýhanasy 10 dana ottegi kontsentratorymen tolyqty. «A+A Idea Fabric» kompanııasynyń basshysy Aınur Kópbasarovanyń demeýshiligimen alynǵan tynys alý apparattary aýrýhana basshylyǵyna tabystaldy, dep habarlaıdy QazAqparat tilshisi.
Aýdan ortalyqtaryndaǵy emdeý mekemelerin medıtsınalyq qural-jabdyqtar men dári-dármekpen qamtamasyz etý máselesine túrli qoǵamdyq uıymdar men kásipkerler de atsalysýda. «A+A Idea Fabric» kompanııasy da osyndaı ıgi isten shet qalmaı, aýdandyq aýrýhanadaǵy naýqastardyń erterek jazylyp ketýine qolǵabys etti.
Qaıyrymdy istiń júzege asýyna uıytqy bolǵan jandardyń biri jýrnalıst, qoǵam belsendisi Ashat Sadyrbaıdyń aıtýynsha, bul qaıyrymdylyq sharasy aldaǵy ýaqytta da jalǵasyn tabady. Osy oraıda aýdandyq aýrýhana ujymy izgilikti is jasaǵan qoldaýshylar men uıymdastyrýshylarǵa óz alǵystaryn bildirdi.
