Tóle bı aýdanynda medıtsınalyq tirek ashylyp, ortalyq aýrýhana kúrdeli jóndeýden ótti
TÚRKІSTAN. QazAqparat - Túrkistan oblysy, Tóle bı aýdanyndaǵy Ońtústik eldi mekeninde qurastyrmaly-qańqaly medıtsınalyq tirek ashyldy.
El Táýelsizdigi qarsańynda uıymdastyrylǵan saltanatty sharaǵa oblystyq Densaýlyq saqtaý basqarmasynyń basshysy Muqan Egizbaev pen Tólebı aýdanynyń ákimi Baýyrjan Omarbekov qatysty, dep habarlaıdy QazAqparat tilshisi.
Nebári eki aıdyń ishinde boı kótergen zamanaýı qurastyrmaly - qańqaly medıtsınalyq tirektiń quny 30 mln.teńgeni quraıdy. Nemis tehnologııasymen jasalǵan bekette feldsher, dáriger - terapevt jáne medbıke qyzmet kórsetedi. Osylaısha aýyl turǵyndary alǵashqy kómekti alysqa barmaı - aq qoljetimdi jerden ala alady. Jalpy alańy 125 sharshy metr bolatyn tirek medıtsınalyq quraldarmen tolyq jabdyqtalǵan.
Bul kúni sondaı-aq kúrdeli jóndeýden ótken Tóle bı aýdandyq aýrýhanasy da paıdalanýǵa berildi. Ǵımaratta aýrýlardy qabyldaýǵa tolyq jaǵdaı jasalǵan. Qabyldaý bóliminde kishi ota bólmesi ashylyp,shuǵyl zerthana jáne dıagnostıkalyq bólmesi bar.
Naýqastardy saralaýǵa yńǵaıly kóp fýntskıonaldy kereýet ornatylyp, balalardy qaraý bólmesi de ashylyp otyr. Budan ózge júkti áıelderdi qaraý, shuǵyl túrde bosandyrý jáne asa qaýipti ınfektsııaǵa kúdikti naýqastardy saralaý bólmelerin kezdestirýge bolady. Bólimder ortaqtandyrylǵan ottegimen tynys alý júıesimen jabdyqtalyp, aýrýlardy qabyldaıtyn avtokólikke arnalǵan pandýsty estakadalyq jol jańadan salynǵan. Emhanaǵa kelgen naýqastar kezegin kýtý úshin arnaıy zal ashylyp, elektrondy monıtorlar men daýysty habarlaǵyshtarmen jabdyqtalǵan.
