Tóle bı aýdanynda eriktiler aýrýhanalarǵa 300 lıtr saýmal-qymyz úlestirdi

TÚRKІSTAN. QazAqparat – Túrkistan oblysynyń Tóle bı aýdanyndaǵy aýrýhanalarǵa eriktiler 300 lıtr saýmal-qymyz úlestirdi, dep habarlaıdy QazAqparat tilshisi.

Atalǵan ıgi sharany aýdandyq ishki saıasat bólimine qarasty Jastar resýrstyq ortalyǵy uıymdastyrdy. Aýrýhana dárigerleri men em alýshylar eriktilerge alǵys aıtty. Sonymen qatar, aýdandaǵy demeýshilerdiń qoldaýymen 500 dana «Paratsetomol» dárisi aýdan ortalyǵyndaǵy dárihanalar aldynda turǵyndarǵa tegin taratyldy. Onyń 100 danasy Leńgir qalalyq aýrýhanasyna berildi.

Al, Sozaq aýdanynda jergilikti kásipker aýrýhanaǵa 2 tynys alý apparatyn syılady. Nurlanov Bazarbaı qazirgideı qıyn sátte aýdan halqyna kómek qolyn sozyp, talaı aýrýdyń ómirine arasha bolýǵa óz septigin tıgizgisi keletinin aıtqan. Bul ottegi kontsentratory Sholaqqorǵandaǵy ortalyq jáne Taýkent kentindegi aýrýhanalarǵa tabys etildi.