Tóle bı aýdanynda 180 páter paıdalanýǵa berilmek
TÓLEBI AÝDANY. QazAqparat – Túrkistan oblysynyń Tóle bı aýdanynda turǵyn úı qurylysy qarqyndy júrip jatyr, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Baspasóz qyzmetiniń málimetterine qaraǵanda, ótken jyly 66 otbasy turǵyn úımen qamtylǵan. Bıyl Leńgir qalasyndaǵy I móltekaýdanda 5 qabattan turatyn árqaısysy 20 páterli 9 úıdiń qurylysy aıaqtalyp, 180 otbasyn turǵyn úımen qamtý josparlanyp otyr. Jalpy aýmaǵy 11 000 sharshy metrdi quraıdy.
Sonymen qatar, Qasqasý aýyldyq okrýgi Qasqasý, Joǵarǵy Qasqasý, Keregetas jáne Keńesaryq eldi mekenderine gaz kirgizý jumystary júrgizilýde. Qasqasý aýyldyq okrýgi boıynsha 65,7 shaqyrym gaz qubyryn tartý josparlanǵan. Búgingi kúnge 10 shaqyrym gaz qubyrynyń shuńqyry qazyldy.
Qazirgi tańda Tólebı aýdanyndaǵy 55 eldi mekenniń 48-i tolyq tabıǵı gazben qamtylǵan. Aldaǵy ýaqytta Dıhankól, Uzynaryq, Alshaly, Qasqasý, Joǵary Qasqasý, Keregetas, Kenesaryq eldi mekenderine kógildir otyn kiretin bolady.
