Tolassyz jaýynnan Almaty kóshelerin sý basty
ALMATY. QazAqparat – Almatyda tolassyz jaýǵan jaýynnan kóshelerdi sý basty, dep habarlaıdy QazAqparat tilshisi.
Sý astynda qalǵan kóshelerdegi kórinisti turǵyndar sýretke, vıdeoǵa túsirip, áleýmettik jelige salyp jatyr.
Tańǵa jýyq bastalǵan jańbyr áli de tolassyz jaýyp tur.
Aǵyn sýlar aryqtan asyp trotýarlarǵa jaıylyp jatyr. Ásirese kópirlerdiń asty men saılarda sý tizege jetip qaldy.
Jaıaý júrginshilerdiń kópshiligi sý keship júr. Qalanyń biraz ýchaskesinde qozǵaltqyshyna sý tıgen kólikter toqtap tur.
«Kazgıromet» RMK boljaýynsha, búgin túnde aýa temperatýrasy +11 gradýsqa deıin túspek. Jaýyn-shashyn erteń de jalǵasýy múmkin. Ashyq kún raıy 11 qyrkúıek kúni ǵana kútiledi.
Qalalyq Tótenshe jaǵdaılar departamenti sınoptıkterdiń eskertýine baılanysty habarlandyrý taratyp jatyr. «10-11 qyrkúıek aralyǵynda Almaty qalasyna jaqyn ornalasqan aýmaqtarda nóserli jańbyrdyń boljanýyna baılanysty, keı jerlerde qatty aǵyndar qalyptasyp, taý ózenderinde sý deńgeıi kóterilýi múmkin»,- delingen habarlamada
