Tolassyz jaýyn saldarynan Almatynyń 19 kóshesin sý basty
ALMATY. QazAqparat - Almatyda 22-27 aqpan aralyǵynda qalalyq TJD kezekshi pýltine 85 habarlama túsken. Bul týraly QR TJM resmı ókili Rýslan Imanqulov aıtty, dep habarlaıdy QazAqparat tilshisi.
Jaýyn tolassyz jaýǵan 27-aqpanda turǵyndardan TJD kezekshi pýltine 56 qońyraý túsken.
«Atap aıtqanda, 37 aýlany sý alyp, 19 kóshe sýda qalǵan. Onyń ishinde 2 jer úıge sý kirgen. Sýdyń jaıylýyna qatysty 43 oqıǵaǵa aryqtar qoqysqa tolyp ketýine qatysty bolsa, 13 derekte sý aǵyp ketetin aryqtar múlde bolmaǵan. Alataý aýdany boıynsha - 18, Medeý aýdanynda - 15, Naýryzbaı aýdanynda - 14, Bostandyq aýdanynda - 5, Almaly aýdanynda - 2, Túrksib aýdanynda 2 aýlany sý basqan», - dedi Rýslan Imanqulov.
Onyń aıtýynsha, qazir qalalyq TJD mamandary 36 ýchaske boıynsha tazalaý jumystaryn aıaqtady. Birqatar nysan boıynsha sý sorý jumystary 28-aqpanda jalǵasyp jatyr.
Jaıylyp ketken sýdyń saldaryn joıýǵa 254 adam, 45 tehnıka, 9 motosorǵy jumyldyrǵan.
