Tól teńgemizdiń tarıhy
ASTANA. QazAqparat - Búgin Ulttyq valıýta - teńge kúni. 1997 jyly el Prezıdenti Nursultan Nazarbaevtyń Jarlyǵymen 15 qarasha - tól valıýtamyzdyń týǵan kúni ári qarjygerler kúni bolyp belgilendi.
Tól valıýtamyzdyń alǵash paıda bolýy, ózgerýi jáne túrlenýi tarıhyna kóz júgirtetin bolsaq:
1992 jyldyń 27 tamyzy kúni Ulttyq bank teńge kýpıýrasynyń úlgilerin bekitti. Ertesine qazaq valıýtasyn ómirge keltirgen sýretshiler Tımýr Súleımenov, Meńdibaı Alın, Aǵymsaly Dúzelhanov, Qaırolla Ábjálelovter Anglııaǵa attandy. 1992 jyly teńge dızaınyndaǵy portretter bekitildi. Teńge Ulybrıtanııada basylyp shyqty. 1993 jyldyń 12 qarashasy kúni Elbasy Nursultan Nazarbaev «Qazaqstan Respýblıkasynda ulttyq valıýta engizý týraly» Jarlyqqa qol qoıdy. 1993 jyldyń 15 qarashasynda Táýelsiz Qazaqstan Respýblıkasynyń tól valıýtasy aınalymǵa endi. Eski aqshany qazaqstandyq teńgege aıyrbastaý 1993 jyly 15 qarashada saǵat 8.00-de bastalyp, 20 qarashada saǵat 20.00-de aıaqtaldy. Ulttyq bank bastapqyda 1 teńgeni sol kezdegi myń rýblge baǵalaǵan bolatyn. Degenmen, elimizdiń saıası, áleýmettik máseleleri jáne memleketaralyq qatynastar eskerilip, 1 teńge 500 somǵa bekitildi. Teńge birinshi aınalymǵa kirgen kúni 1 dollar 4,75 teńge bolyp bekitildi. 1994 jyly qaǵaz tıyndardyń ornyna jezden jasalynǵan 2, 5, 10, 20 jáne 50 teńge nomınaldy monetalar shyqty. Ulttyq valıýta banknot jáne moneta túrinde aınalysqa engizildi. Qazir banknot - Ulttyq banktiń Almaty qalasyndaǵy Banknot fabrıkasynda, al moneta - Óskemendegi Moneta saraıynda shyǵarylady. El Prezıdentiniń Jarlyǵymen 1997 jyldan beri 15 qarasha tól valıýtamyzdyń týǵan kúni ári qarjygerler kúni bolyp belgilendi. 2006 jyly 15 qarashada jańa úlgidegi banknottar aınalysqa engizildi.
