Tól pedagogıkalyq keshenniń máni - bilimdi, mádenıetti, ulttyq tulǵa qalyptastyrý - professor N. Orazaqynova
ASTANA. 18 mamyr. QazAqparat - Búgin Astanadaǵy jańa Oqýshylar saraıynda «Satylaı keshendi taldaý» tehnologııasy - álemdik bilim berý aıasyna enýdiń múmkindigi» atty respýblıkalyq forým óz jumysyn bastady.
Forýmnyń maqsaty: satylaı keshendi oqytýdyń róli men mańyzdylyǵyn ashyp, oqýshylarǵa bilimdi ǵylymı negizde satylaı, júıeli, keshendi meńgertip, olarǵa ulttyq qundylyqtardy baǵalaı, qoldana bilýge mashyqtandyrý.
Respýblıkalyq forýmdy Qazaqstan Bilim jáne ǵylym mınıstrligi, Abaı atyndaǵy QazUPÝ, QR Kishi Ǵylym Akademııasy jáne Astana qalasynyń Bilim basqarmasymen uıymdastyrylyp otyr.
QR Kishi Ǵylym akademııasynyń vıtse-prezıdenti Valentına Grışenkonyń aıtýynsha, atalmysh forýmda «Satylaı keshendi taldaý» tehnologııasy boıynsha «Tilim meniń tirligimniń aıǵaǵy» atty XII Respýblıkalyq aýyzsha komandalyq olımpıadasy ótedi. Oǵan elimizdiń Astana, Almaty, Jambyl, Soltústik Qazaqstan, Qyzylorda, Atyraý, Oral oblystarynan kelgen oqýshylar men stýdentter komandalary qatysady. Bunyń aldynda forým Almaty, Taraz qalalarynda ótken bolatyn.
«Ulttyq tól tehnologııa degenimiz - qazaq tilinen bastaý alyp, halqymyzdyń ádebıetin, tarıhyn, jaǵrafııasyn taǵy basqa pánderdiń jıyntyǵyn qurap, oqýshylarǵa jan-jaqty bilim beretin, olardy óz elinde ultynyń bıik tulǵaly azamaty etip qalyptastyra alatyn oqytý. Tól tehnologııa jasaýǵa ózge eldiń ozyq pikirlerimen qatar, qazaq halqynyń kórnekti ǵalymdarynyń oqytý, tárbıe berý týraly jasaǵan ǵylymı tujyrymdary, ádistemelik keshenderi negiz bolyp alyndy», - deıdi atalǵan tehnologııanyń avtory, QR Kishi Ǵylym akademııasynyń vıtse-prezıdenti, Abaı atyndaǵy QazUPÝ-diń qazaq tili teorııasy jáne ádistemesi kafedrasynyń meńgerýshisi, professor Nursha Orazaqynova.
Onyń aıtýynsha, satylaı keshendi taldaý tehnologııasy bastaý kózin Júsipbek Aımaýytov, Ahmet Baıtursynuly, Maǵjan Jumabaev syndy aǵartýshy-ǵalymdardan alady.
«Satylaı keshendi taldaý tehnologııasynyń maqsaty - qazaq tilinde oıyn jetkize alatyn, óz ana tilinde ditin oryndata alatyn, qazaqtyń tarıhy men mádenıetin meńgergen, jan-jaqty bilimdi, mádenı, ulttyq tulǵa qalyptasyrý», - dep atap kórsetti N. Orazaqynova.
