Tól oıynymyz - toǵyzqumalaqtan úzdikter anyqtaldy
NUR-SULTAN. QazAqparat - Qyzylorda qalasynda tól oıynymyz toǵyzqumalaqtan erler men áıelder arasyndaǵy klassıkadan jekeleı chempıonaty óz máresine jetti, dep habarlaıdy QazAqparat tilshisi.
24 qantarda bastalǵan oı-taqta oıyny 1 aqpan kúni jeńimpazdardy anyqtady. Jarysqa 11 oblys pen 3 qaladan jalpy sany 104 sportshy qatysty. Olardyń arasynda Qazaqstan Respýblıkasyna eńbek sińirgen sport sheberleri de bar. 8 kún boıy jalǵasqan jeńiske degen umtylys pen qajyrly qaırattyń nátıjesinde áıelder arasynda bas júldeni Qaraǵandy oblysynan kelgen oıynshy Ańsaǵan Qojanásip jeńip alsa, ekinshi orynǵa Túrkistan oblysynan Ásel Dalıeva ıe boldy. Úzdik úshtikti Aqtóbe oblysynan kelgen Gúljanat Aldabergenova men taǵy bir túrkistandyq Lına Karımova ózara bólisti.
Erler arasynda Shymkent qalasynyń toǵyzqumalaqshysy Ǵalymjan Temirbaevqa teń keler eshkim bolǵan joq. ekinshi orynǵa Qyzylorda oblysynyń oıynshysy Beksultan Bostandyqov ıe bolsa, úshinshi oryndy aqtóbelik Nurbek Qabıev qanaǵat tutty.
Marapattaý rásiminde QR Ulttyq qurama komandasynyń aǵa bapkeri Aınur Jaqapbaeva quttyqtaý sóz sóılep, elimizde toǵyzqumalaq ulttyq oıynyn damytýǵa qosqan úlesi úshin sport ardageri Kım ıÝrıı Fedorovıchke Qazaqstan Respýblıkasy toǵyzqumalaq sporty federatsııasynyń «Toǵyzqumalaq qaıratkeri» tósbelgisin tabystady.
Sonymen birge, oblystyq dene shynyqtyrý jáne sport basqarmasynyń basshysy Asyljan Jamanqul, Ulttyq qurama komandasynyń aǵa bapkeri Aınur Jaqapbaeva jáne sport ardageri Kım ıÝrıı Fedorovıch jeńimpazdar men júldegerlerdi marapattady.
