Tól kúresimizdi Olımpıada oıyndaryna engizýge bar kúshimizdi salyp jatyrmyz - Serik Tókeev
ASTANA. QazAqparat - Qazaq kúresi 2020 jyly Olımpıada oıyndarynyń baǵdarlamasyna enýi múmkin. Bul týraly Ashhabad qalasynda ótip jatqan jabyq keshendegi Azııa oıyndarynda jýrnalısterge suhbat bergen Dúnıejúzilik qazaq kúresi federatsııasynyń birinshi vıtse-prezıdenti Serik Tókeev málim etti.
«Mine, qazaq kúresi tuńǵysh ret jabyq keshendegi Azııa oıyndarynyń baǵdarlamasyna enip, balýandarymyz eki altyn medal jeńip aldy. Bul qazaq eliniń jeńisi. Bul qazaq sportynyń jarqyn jetistiginiń aınasy. Bul Dúnıejúzilik qazaq kúresi federatsııasynyń uzaq jyl jasaǵan eńbeginiń arqasynda qol jetkizgen tabysy. Endi, kelesi jyly Jazǵy Azııa oıyndary ótedi. Buıyrsa qazaq kúresin sol «saryqurlyq» dodasynan da kórýlerińiz múmkin. Ulttyq kúresimiz Jazǵy Azııa oıyndarynyń baǵdarlamasyna ense, ary qaraı 2020 jyly Olımpıada oıyndarynan kórinýimiz ábden múmkin. Qazir tól sportymyzdy tórt jyldyq Olımpıada oıyndarynyń baǵdarlamasyna engizý týraly usynystar jasap, qolymyzdan kelgenshe tyrysyp jatyrmyz», - dedi Serik Tókeev.
Esterińizge sala keteıik, tól kúresimizdi osy jarysqa qosý máselesi ótken jyly Túrkııanyń Ystanbul qalasynda kúres túrleri jóninde ótken forýmda sheshilgen bolatyn. Al bıyl Búkilálemdik kúres odaǵynyń (United World Wrestling) prezıdenti Nenad Lalovıch pen Azııa Olımpıada keńesiniń prezıdenti Sheıh Ahmed ál-Fahad ál-Ahmet ál-Sabah ulttyq kúresimizdi 2017 jylǵy Azııa oıyndarynyń baǵdarlamasyna engizý kelisimine qol qoıdy.
