Toqtatylǵan reısterdiń bıletin satyp alǵandarǵa 55,2 mln teńge qaıtaryldy

NUR-SULTAN. QazAqparat - Tutynýshylardyń quqyqtaryn qorǵaý komıteti toqtatylǵan reıster boıynsha tutynýshylarǵa 55,2 mln teńgeni qaıtarýǵa kómektesti, dep habarlaıdy QazAqparat Saýda jáne ıntegratsııa mınıstrliginiń baspasóz qyzmetine silteme jasap.

Komıtetke barlyǵy 409 tutynýshy ótinish bergen, jalpy somasy 55,2 mln teńgege 847 bılet satyp alynǵan. 847 bılettiń 280-i halyqaralyq áýe reısterine satyp alynǵan, qalǵan bıletter ishki reısterge tıesili.

Eń tanymal halyqaralyq baǵyttar: Frankfýrt, London, Delı, Dýbaı, Antalıa, Praga, Ystanbul, Tegeran, Tokıo, Seýl, Bangkok, Las-Vegas, Krasnodar, Máskeý, Sochı, Sankt-Peterbýrg, Novosıbırsk, Batýmı, Tbılısı, Astrahan, Kıev, Ekaterınbýrg, Dýshanbe, Bishkek.

Komıtettiń málimetinshe, toqtatylǵan áýe reısteriniń bıletiniń qunyn qaıtarý jóninde ótinish bildirgenderdiń jartysynan kóbine qarajat qaıtarylǵan. Osy baǵytta baılanysty jumystar jalǵasýda, TQQK-ke júgingen árbir quqyǵy buzylǵan tutynýshyǵa járdem kórsetedi.

Esterińizge sala keteıik, Tutynýshylardyń quqyqtaryn qorǵaý komıteti «Bek Eır» AQ-na qatysty 3-shi talap aryz Almaty qalasy Túrksib aýdandyq sotynyń qaraýynda jatyr. 212 bılet satyp alǵan 108 azamat jalpy somasy 7,6 mln teńgesin qaıtarýdy talap etken. Alǵashqy sot otyrysy 11 qyrkúıekte ótti. Kelesi sot otyrysy 29 qyrkúıekke belgilengen.

Sonymen qatar, 18 qyrkúıekte Almaty qalalyq sotynda azamattyq ister boıynsha apellıatsııalyq sot alqasynda komıtettiń birinshi talap aryzy boıynsha 17 maýsymdaǵy «Bek Eır» AQ apelıatsııalyq shaǵymy jónindegi sottyń sheshimine qatysty birinshi otyrysy ótedi.

Sondaı aq, «Bek Eır» AQ komıtettiń ekinshi talap aryzy boıynsha Almaty qalasy Túrksib aýdandyq sotynyń 24 shildedegi sheshimine qatysty appelıatsııalyq shaǵym berdi.