Toqtarbek Tańatqanuly Qytaıdyń úzdik sportshysy tizimine endi
Qytaıdyń Memlekettik sport jáne dene shynyqtyrý bas basqarmasynyń kadrlar mekemesi Hanchjoýda ótken HІH Azııa oıyndary jáne IV Azııa para oıyndaryndaǵy úzdik toptar men eń úzdik sportshylardyń tizimin jarııalady. Kazinform bul týraly Qytaıdyń «Ortalyq halyq radıosyna» silteme jasap habarlaıdy.
Memlekettik bas basqarmanyń qoıǵan talaptaryna saı Hanchjoýda ótken HІH Azııa oıyndary jáne IV Azııa para oıyndaryndaǵy 96 top jáne 144 jeke azamat úzdik sportshy tizimine endi.
Sol úzdik jeke sportshylardyń ishinde Shyńjańnan eki sportshy tańdap alynǵan. Onyń biri qandasymyz, qytaılyq boksshy - Toqtarbek Tańatqanuly.
Atap aıtqanda, Shyńjań ólkelik Dene shynyqtyrý mekemesi boks sportyn basqarý ortalyǵynyń sportshysy - Toqtarbek Tańatqanuly, sondaı-aq Shyńjań ólkelik dene shynyqtyrý mekemesi dene shynyqtyrý №1 komandasynyń sportshysy - Abdýhalyqjan Mútálip.
Esterińizge sala keteıik, Toqtarbek Qytaıdaǵy qazaqtar jıi qonystanǵan Altaı aımaǵy Alaǵaq qalashyǵyna qaraıtyn Taralań degen aýylda 1996 jyly 18 qarashada dúnıege kelgen.
Ol 2017 jyly qazan aıynda bokstan Qytaı ulttyq quramasyna qabyldanǵan.
Tokıoda ótken Olımpıada oıyndaryna qatysqan qandasymyz «Qytaıdyń boks koroli» ataǵyn 2017, 2019, 2020 jáne 2021 jyldary tórt ret jeńip alǵan. 2023 jyly Tashkentte bokstan álem chempıonatynyń «kúmis» júldegeri atanǵan, Hanchjoýda ótken HІH Azııa oıyndarynda «altyn» medaldy enshilegen bolatyn.
