Toqtar Tóleshovtiń sybaılastaryna taǵylǵan aıyp ózgerýi múmkin

Sot talqylaýy kezinde memlekettik qyzmetshilerdiń eki jyl buryn para alǵany týraly naqty dáleldemeler tabylmaǵan. Olar tergeý kezinde para aldyq degenimen, ony dáleldeıtin kýágerler de, beıne túsirilim de joq. Onyń ústine para alý kezinde arnaıy untaq jaǵylǵan aqshalar bolýy kerek. Alaıda tergeý qujattarynda mundaı aqshalar bolǵany jóninde kórsetilmepti. Tek bári aýyzeki aıtylǵan jaýaptarmen túzilgen.
Sondyqtan óńirdiń prokýrorlary Bas prokýratýramen kelisken túrde sotqa basqa aıyptaý aktisin usyndy. Onda aıyptalýshy tórt adamǵa taǵylǵan aıyptar  Qylmystyq kodekstiń 366-baby «Para alý» boıynsha emes, 361-babynyń 2-shi bóligi «Laýazymdyq ókilettikterdi teris paıdalanýǵa» ózgertý jóninde usynys berilgen.  Bul bappen kináli dep tanylsa, burynǵy memlekettik qyzmetshiler  múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyrylýy múmkin. Nemese  olarǵa tórt myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryn jasaýǵa,  tórt jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalaý qarastyrylǵan.



Óz kezeginde, isti qarap jatqan sýdıa Myrzaly Jorabaev jańadan berilgen aıyptaý aktisimen tanysý úshin onyń kóshirmesin qorǵaýshylarǵa berdi. Sóıtip kezekti sot otyrysyn kelesi aptaǵa qaldyrdy.

 

Eske salaıyq, «Syra koroli» Toqtar Tóleshov pen onyń segiz sybaılasyna qatysty sot otyrysy  10 shildede bastalǵan bolatyn. Tóleshovtiń isi boıynsha aıyptalyp jatqan  Shymkent qalasynyń Eńbekshi aýdany boıynsha memlekettik kirister basqarmasynyń  qyzmetkerleri Gúljan Bekseıitova, Samat Aldabergenov pen bas mamandar Nurjan Qaraqojaev jáne Madııar Musaevtar buǵan deıin  "para alǵan" dep aıyptalǵan edi.