Toqtar Tóleshovtiń burynǵy kúzetshisine qatysty sot úkimi shyqty
ShYMKENT. QazAqparat - Ońtústik Qazaqstan oblysynda Toqtar Tóleshovtiń burynǵy kúzetshisine qatysty sot úkimi shyqty. Óńirdegi Qylmystyq ister jónindegi mamandandyrylǵan aýdanaralyq soty 35 jastaǵy aıyptalýshy Rýslan Ergebaevty úsh jylǵa bas bostandyǵynan aıyrdy, dep habarlaıdy QazAqparat HAA tilshisi.
Úsh aıǵa sozylǵan sot otyrysy barysynda kúzetshiniń adam urlaý, kúsh qoldaný sııaqty qylmystarǵa qatystylyǵy tolyq dáleldengen.
«Toqtar Tóleshov óziniń bedeli men qyzmetin paıdalana otyryp, uıymdasqan qarýlanǵan topty (banda) qurǵan. Olardyń músheleri men qatar Ergebaev ta sol topqa kiredi. Aldyn ala sóz baılasýdyń arqasynda olar krımınaldyq qylmystardy jasaýmen, adamdardy urlaýmen aınalysqan. Bir epızod boıynsha adam urlaǵan, ekinshi epızod boıynsha basqa bir adamdy soqqyǵa jyǵyp, pyshaqpen jeńil jaraqattaǵan. Biraq ol adamdy ólmegen, ony ólmeshi etip sabaǵan. Osylaısha adamdardy jazalap otyrǵan. Ergebaevtyń róli kólik júrgizip otyrǵan, qajet bolǵan jaǵdaıda kúsh kórsetedi. Sondaı qylmystardy 2012 - 2015 jyldar aralyǵynda birneshe ret jasaǵan bul toptyń músheleri»,-deıdi iske qatysqan prokýror Jasulan Ádilbaıuly.
Oblystyq prokýratýranyń basqarma bastyǵy orynbasarynyń sózinshe, qylmystyq toptyń músheleri bir jábirlenýshini alty aı boıy azaptaǵan.
«Bir jábirlenýshini tanystarynyń ólimine qatysy bar dep kúdiktengen. Sol úshin ol adamdy ustap ákelip, alty aı boıy azaptap, qınaǵan. Sol ólimge qatysy barlyǵyn anyqtamaq bolyp, uryp-soqqan. Jaldamaly páterlerde ustap, qorqytqan. Sol kezde Rýslan Ergebaev jábirlenýshini tasymaldaıtyn kólik júrgizýshisi bolǵan. Sot barysynda onyń urlanǵan adamdy qınap, kólikke otyrǵyzyp júrgeni dáleldendi»,-dedi Jasulan Ádilbaıuly.
Alaıda tergeý barysynda aıyptalýshynyń tamaǵy qaterli isik aýýyna shaldyqqany anyqtalady. Ol birneshe aı boıy aýrýhanalarda jatyp, em qabyldaıdy. Sot úsh aıǵa sozylsa, sonyń eki aıynda ol emdelip júrgen. Sondyqtan aıyptalýshynyń isi Tóleshovtiń qaramaǵyndaǵylardan bólektenip, turǵylyqty mekenjaıy boıynsha qaralǵan. Densaýlyǵyna baılanysty qamaýǵa alynbaı, kepil túrinde úıine jiberilgen. Sot úkimin shyǵarý kezinde de onyń aýyr dertke shaldyqqany eskerilip, jazasy jeńildetilgen. Al, birge qylmys jasaǵan sybaılastary 4-5 jyldan jaza arqalap ketken bolatyn.
«Aıyptalýshy Qylmystyq kodekstiń 268, 125, 107-shi baptarymen kináli dep tanylsyn. Onyń jasaǵan qylmysyna ókiný, kinásin tolyq moıyndaý, tergeýge qolǵabys etý jaǵdaılary eskerilip, úsh jylǵa bas bostandyǵynan aıyrý jazasy qoldanylsyn. Jazasyn qatań tártiptegi kolonııada ótý taǵaıyndalsyn. Úkimmen kelispegen jaǵdaıda narazylyq keltirýge bolady», - dedi sotta oblystyq Qylmystyq ister jónindegi mamandandyrylǵan aýdanaralyq sotynyń tóraǵasy Jánibek Seıtjapparov.
Esterińizge salaıyq, Shymkenttik kásipker Toqtar Tóleshov 16 aýyr qylmys jasaǵany, memlekettik tóńkeris uıymdastyrmaq bolǵany úshin kináli dep tanylyp, 21 jyl jylǵa sottalǵan bolatyn. Sondaı-aq onyń 25 sybaılasy 3 pen 7 jyl aralyǵynda bas bostandyǵynan aıyrylǵan edi.
