Toqtar Áýbákirov «Qyzylorda oblysynyń qurmetti azamaty» atandy
Búgin Syr óńirinde el Táýelsizdiginiń 30 jyldyǵy mereıtoıy aıasynda egemen eldiń damýyna ólsheýsiz úles qosqan birqatar azamattar memlekettik nagradalarmen marapatqa ıe boldy.
N.Bekejanov atyndaǵy qazaq akademııalyq drama teatrynda ótken saltanatty jıynda Senat Tóraǵasy Máýlen Áshimbaev Syr eli halqyn Táýelsizdiktiń mereıtoıymen quttyqtap, memlekettik nagradalardy tabys etti.
Mereıtoılyq saltanatta syrboıylyq azamattar «Parasat», «Qurmet» jáne ІІІ dárejeli «Eńbek dańqy» ordeni, «Eren eńbegi úshin», «Shapaǵat» medalin, Qurmet gramotasyn ıelendi.
Sondaı-aq, oblys ákimi Gúlshara Ábdiqalyqova Qazaq eliniń tuńǵysh ǵaryshkeri, Halyq qaharmany Toqtar Áýbákirovke, burynǵy sý sharýashylyǵy mınıstri Narıman Qypshaqbaevqa, QR Parlamenti Senatynyń depýtaty Murat Baqtııarulyna «Qyzylorda oblysynyń qurmetti azamaty» ataǵyn tabys etti.
Toqtar Áýbákirov 1946 jyly Qaraǵandy oblysynda dúnıege kelgen. 1991 jyly 2 qazanda Baıqońyrdan «Soıýz TM-13» kemesimen ǵaryshqa ushty. Ǵaryshta bıotehnologııa, metallýrgııa, medıtsına salalary jáne Aral aımaǵy boıynsha ǵylymı-zertteý jumystaryn júrgizdi. QR Qorǵanys mınıstriniń 1 orynbasary, QR Ulttyq aeroǵaryshtyq agenttiginiń bas dırektory - Ǵylym jáne jańa tehnologııa mınıstriniń orynbasary, QR Joǵarǵy Keńesiniń depýtaty – Qorǵanys jáne qaýipsizdik komıtetiniń tóraǵasy, QR Prezıdentiniń keńesshisi laýazymdaryn abyroımen atqardy. Qazaq KSR Joǵarǵy Keńesiniń 12 shaqyrylym depýtaty, QR Joǵarǵy Keńesiniń 13 shaqyrym depýtaty, Qyzylorda oblysynan QR Parlamenti Májilisiniń 3-shi shaqyrylym depýtaty bolyp saılanǵan.
Narıman Qypshaqbaev 1934 jyly Qostanaı oblysynda dúnıege kelgen. 1974 jyldan táýelsizdik alǵanǵa deıin Qazaq KSR Melıoratsııa jáne sý sharýashylyǵy mınıstrligin basqardy. 1990 jyly Sý resýrstary memlekettik komıtetiniń tóraǵasy bolyp taǵaıyndalǵan. Táýelsizdik jyldary Sý kodeksi jobasynyń ázirlenýine jetekshilik jasap, Ortalyq Azııa, Reseı Federatsııasy jáne Qytaı memleketteri arasynda transshekaralyq ózenderdegi sý resýrstaryn paıdalaný jóninde halyqaralyq uıymnyń qurylýyna, sonyń ishinde Qazaqstan, Qyrǵyzstan, Tájikstan, Túrkimenstan, Ózbekstan memleketteriniń prezıdentterimen qurylǵan Halyqaralyq Araldy qutqarý qorynyń qurylýyna úlesi zor. Qazirgi tańda Aral, Syrdarııadaǵy sý deńgeıi máselelerine qatysty usynystaryn jetkizip, eldik múddesine qyzmet etýde.
Murat Baqtııaruly 1958 jyly Qyzylorda oblysynda dúnıege kelgen. 1986-1998 jyldary Qyzylorda pedagogıkalyq ınstıtýty tarıh kafedrasynyń aǵa oqytýshysy, kafedra meńgerýshisi, tarıh jáne quqyq fakýltetiniń dekany qyzmetterin atqaryp, bilim salasynyń damýyna zor úles qosty. Tarıh ǵylymdarynyń kandıdaty, saıası ǵylym doktory, professor. Qyzylorda oblysynyń oblystyq maslıhat depýtaty, Qyzylorda oblysy ákiminiń orynbasary laýazymyn abyroımen atqardy. Qazirgi tańda QR Parlamenti Senatynyń Áleýmettik-mádenı damý jáne ǵylym jónindegi komıtetiniń tóraǵasy.
