Toqta, vandal! Astana polıtsııasy qala múlkin saqtaýǵa shaqyrdy
Vandalızm, ǵımarattar men múlikti búldirý – qoǵamdaǵy problemalardyń biri. Sebebi mundaı áreketter qalanyń kórkeıýine keri áserin tıgizedi. Tipti, shalǵaı aımaqtardan bólek, elordanyń ózinde polıtsııa qyzmetkerleri atalmysh faktilerge jıi kýá bolyp jatady.
Ustamsyzdyq pen shekten tys agressııanyń kórinis tabýy zań men tártipti buzyp qana qoımaı, aınaladaǵylarǵa aıtarlyqtaı zııan nemese shyǵyn keltirýi múmkin. Máselen, 16 tamyz kúni túngi ýaqytta Astana turǵyny ǵımarattardyń birinen shyǵyp kele jatyp, quny jarty mıllıon teńgeden asatyn esikti syndyrǵan. Er adamnyń bul áreketi beınebaqylaý kamerasyna túsip qalǵan.
Memleket basshysy eldegi turaqtylyq pen qoǵamdyq tártipti qamtamasyz etýge erekshe kóńil bóledi. Onyń tapsyrmasy boıynsha bıyl vandalızm aktileri, qoǵamdyq jáne jeke múliktiń búlinýi úshin jaýapkershilik kúsheıtildi.
«Vandalızm, keıbir azamattarymyzdyń tártipsizdigi, mádenıetsizdigi, neshe túrli turmystyq janjaldar elimizdiń halyqaralyq arenadaǵy abyroıyna nuqsan keltiretin boldy. Bizdiń negizgi maqsatymyz – zańdy qatań saqtaý, qoǵamdyq tártipti qamtamasyz etý», – dedi Qasym-Jomart Toqaev óziniń halyqqa jasaǵan joldaýynda.
Qoǵamdyq tártipti qamtamasyz etý úshin elorda kóshelerine kún saıyn 2 500-den astam polıtsııa qyzmetkeri men Ulttyq ulannyń áskerı qyzmetshileri kezekshilikke shyǵady. Qoǵam belsendileri jáne eriktilermen birlesip, turaqty negizde «Toqta, vandal!» aktsııasy ótkiziledi. «Nóldik tózimdilik» qaǵıdaty boıynsha qoǵamdyq oryndarda balaǵat sózder aıtqany, adamdy qorlaǵany, ǵımarattar men ózge de nysandardy búldirgeni jáne qoǵamdyq tártip pen azamattardyń tynyshtyǵyn buzatyn basqa da osyndaı áreketter úshin ákimshilik jaýapkershilik, ıaǵnı 15 táýlikke deıin qamaýǵa alý jazasy kózdelgen.
«Qurmetti azamattar! Sizderdi qoǵamdyq tártipti saqtaýǵa jáne qala múlkine uqypty bolýǵa shaqyramyz. Kez kelgen quqyq buzýshylyq anyqtalyp, sońy jaýapkershilikke ákeletinin umytpańyzdar! Іshki tártip, zańǵa jáne basqa adamdardyń quqyqtaryna qurmetpen qaraý – bul qazaqstandyq qoǵam umtylýǵa tıis normalar», – dedi Astana qalasy PD patrýldik polıtsııa polkiniń ınspektory Ernat Qońyrbaı.
