Oqýshylardyń toqsandyq baǵasy endi qalaı qoıylady
ASTANA. KAZINFORM – Toqsandyq baǵanyń 50 paıyzy formatıvtik, 50 paıyzy aralyq baǵalaý nátıjeleri negizinde esepteledi. Bul týraly QR Oqý-aǵartý birinshi vıtse-mınıstri Shynar Aqparova málimdedi.
Onyń aıtýynsha, toqsandyq baǵa mekteptiń LMS júıesinde belgilengen biryńǵaı formýla boıynsha avtomatty túrde esepteledi. Júıede oqýshynyń formatıvtik jáne aralyq baǵalaý nátıjeleri, sondaı-aq olardyń qorytyndy baǵadaǵy úlesi kórsetiledi. Bul ata-anaǵa, oqýshyǵa jáne pedagogke toqsandyq baǵanyń qalaı qalyptasqanyn túsinýge múmkindik beredi.
– Bastaýysh synyptarda aralyq baǵalaý jumystaryna moderatsııa júrgizilmeıdi. Baǵalaýdyń biryńǵaı talaptary men ony uıymdastyrý tártibi saqtalady. Al moderatsııanyń bolmaýy, TJB-nyń jeke ótkizilmeýi jáne daıyn jaýap paraqtaryn ázirleý qajettiliginiń azaıýy pedagogtiń rásimdik jumysyn ońtaılandyryp, ýaqytyn oqý protsesine jáne bilim alýshymen tikeleı jumysqa kóbirek baǵyttaýǵa jaǵdaı jasaıdy, – dedi birinshi vıtse-mınıstr.
Jańartylǵan baǵalaý tásilderiniń barlyq bilim berý uıymdarynda birizdi qoldanylýyn qamtamasyz etý úshin pedagogterge ortalyqtandyrylǵan ádistemelik qoldaý kórsetiledi.
Ybyraı Altynsarın atyndaǵy Ulttyq bilim akademııasynyń Baǵalaý ortalyǵy baǵalaýdyń biryńǵaı talaptary men tártibin aıqyndap, pedagogterge ádistemelik usynymdar men tapsyrma úlgilerin usynady.
Erekshe bilim berý qajettilikteri bar oqýshylardyń jeke erekshelikteri de eskeriledi. Pedagog qajet bolǵan jaǵdaıda olar úshin saralanǵan nemese jeke tapsyrmalar ázirleı alady. Tapsyrmalardyń kólemi, nysany, oryndalý tásili men ýaqyty balanyń jeke qajettilikterine qaraı beıimdelýi múmkin.
Aıta keteıik, mekteptegi aralyq baǵalaý ne úshin kerek ekenin jazǵanbyz.
