Tokıoǵa joldama alǵan sportshylar 14 kúndik karantınge jatqyzylady
Komıtettiń bas hatshysynan BAQ ókilderi Tokıodan naqty qansha medal kútýge bolatynyn suraǵan bolatyn.
«Búkil álem qazir pandemııa jaǵdaıynda tur. Biz qazir sportshylardyń bárin oqshaýlap jatyrmyz. Bári 14 kúndik karantınge alynady. Óıtkeni Olımpıadanyń ashylý saltanatyna 20 kún ǵana qaldy. Bizdiń qazirgi mindetimiz sportshylarymyz utyp alǵan lıtsenzııalardyń sany boıynsha túgel Tokıoǵa jetkizý. Toǵıoǵa barǵan soń da olardyń qaýipsizdigin qamtamasyz etemiz. Osydan keıin ǵana boljam aıtýǵa bolady. Sporttyń aty – sport. Qazir eshbir sport túrinen 100 paıyz senimdi boljamdy kesip aıta almaısyń. Taǵy bir mańyzdy dúnıe, komanda Tokıoǵa jetken kezde ǵana sportshylardyń kúıi qandaı ekenin kóre alamyz», - dedi Andreı Krıýkov.
Ulttyq Olımpıada komıtetiniń bas hatshysy Tokıodan jýrnalısterge kontent usyný máselesi áli tolyq aıqyndalmaǵanyn da atap ótti. Óıtkeni Halyqaralyq Olımpıada komıteti men Japonııa tarapy sheteldik jýrnalısterdiń kelýin qatty shektep otyr.
«Jýrnalıstermen de sol kezde tyǵyz jumys isteımiz. Biz arnaıy baǵdarlama daıyndap qoıdyq. Halyqaralyq Olımpıada komıteti de, Tokıo bıligi de jýrnalısterdiń sportshylarmen aralasýyn qatty shektegenin bilesizder. Buryn baspasóz ortalyǵyn uıymdastyryp, sportshylarmen kózbe-kóz baılanysa alsaq, qazir bul múmkin emes. Jýrnalıstermen jumys qalaı júretinin qazir ashyp aıta almaımyz. Kontentti qalaı alatynymyzdy da aıta almaımyz», - deıdi komıtet ókili.
Osynyń bárin eskergen Ulttyq Olımpıada komıteti Tokıodan taratylatyn kontentti barlyq BAQ ókilderin olympic.kz portaly arqyly usynýdy josparlap otyr.
«Olympic.kz portaly arqyly búkil kontent jýrnalıster úshin qoljetimdi bolady. Mundaı birinshi ret bolǵaly otyr. Óıtkeni sportshylarǵa qol jetkizý múmkin bolmaıyn dep tur. Qurǵaq jańalyq kóshirip taratý men sporshyny tikeleı áńgimege tartý arqyly kontent taratý eki bólek dúnıe ekenin túsinemiz», - dedi Andreı Krıýkov.
