Tokıoǵa deıin komandamen birge bolamyn - Alekseı Nı
ASTANA. QazAqparat - Aýyr atletıkadan Qazaqstan ulttyq quramasynyń burynǵy bas bapkeri Alekseı Nı qyzmetinen ketse de, óz tájirıbesimen bólisýge ázir. Tokıo Olımpıadasyna deıin ol komandanyń daıyndyǵyna óz úlesin qosýdy qalaıdy, dep xabarlaıdy QazAqparat tilshisi.
«Shynymdy aıtsam, meni eshkim qýǵan joq. Bul meniń jeke sheshimim boldy. Ony asyǵys jasadym dep oılamaımyn. Rıo Olımpıadasynyń aldynda sportshylardyń synamalaryn qaıta tekserý naýqany bastalǵan kezde ishteı bárin oı eleginen ótkizip, bas bapkerdiń qyzmetinen ketýge bel baıladym. Endi, týra tórt jylda bir ret bolatyn jarystyń aldynda bárin tastap ketpeısiń ǵoı. Al Olımpıadadan keıin federatsııa, Olımpıada komıteti men mınıstrlik myqty degen advokattardyń birneshe tobyn jaldap, medaldardy saqtap qalýǵa kúsh saldy. Sol daý-damaı bizdiń paıdamyzǵa sheshiledi degen úmit oty sońyna deıin óshken joq. Alaıda qyzdardyń medaldaryn alyp qoıǵannan keıin ol protsesti toqtatý múmkin emes ekenin túsindim. Ilıa Ilınniń chempıondyq tıtýldaryn alyp qoıǵan soń, basshylyq meniń aryzymdy qabyldap, qol qoıdy», - dedi A.Nı Vesti.kz saıtyna bergen suxbatynda. Osy oraıda ol London Olımpıadasynda bolǵan tolaǵaı tabystardan keıingi óziniń «Álem bizge buny keshirmeıdi» degen sózine túsinikteme berdi.
A.Nıdiń aıtýynsha, Londonda tórt birdeı altyn medal jeńip alǵannan keıin kóptegen adamdar tańqalyp qana qoımaı, «álemniń bundaı jaǵdaıdy keshirmeıtinin» ashyq bildirdi. Al Rıo Olımıpıadasyna qatysatyn qazaqstandyq ziltemirshilerdiń esimderi jarııalanǵan boıda synamalardy qaıta tekserý naýqany bastaldy. Dál qazir Nı myrza qyzmetinen ketse de, ulttyq quramaǵa kómektesýge ázir.
«Erteń ne bolatynyn bilmeımin. Degenmen, men bapkerler men sportshylarǵa kómektesetin bolamyn. Qazaqstannyń aýyr atletıkasynda kem degende Tokıo Olımpıadasyna deıin qyzmet etemin. Qaı qyzmetti beretinderi men úshin mańyzdy emes. Bastysy, Rıo Olımpıadasynyń aldyndaǵy jaǵdaı qaıtalanbasa boldy. Men óz tájirıbemdi paıdalanyp, komanda úshin barynsha paıdaly bolýǵa tyrysamyn. Árıne, bas bapker qalasa», - dedi A.Nı.
Aıta keteıik, jeltoqsannyń 2-si kúni aýyr atletıkadan Qazaqstan quramasy bas bapkeriniń mindetin atqarýshy qyzmetine ıÝrıı Melnıkov taǵaıyndalǵan bolatyn.
