Tokıoǵa barǵan boksshylardyń ratsıonynda qazy da bar - bas bapker

NUR-SULTAN. QazAqparat – Bokstan Qazaqstan erler quramasynyń bas bapkeri Ǵalymbek Kenjebaev shákirtteriniń Tokıo tórinde qalaı tamaqtanyp júrgeni týraly málimet berdi, dep habarlaıdy QazAqparat tilshisi.

Tokıodan BAQ ókilderimen Zoom arqyly tikeleı baılanysqa shyqqan bas bapker Olımpıada qalashyǵynda sportshylar jasalǵan jaǵdaıǵa kóńilderi tolatynyn aıtty.

«Bárimiz mundaǵy jaǵdaıǵa boı úıretip boldyq. Jasalǵan jaǵdaı qalypty, taza, sportshylarǵa arnalǵan. Bul jerge biz demalýǵa kelgen joqpyz ǵoı. Sportshylardyń tynyǵýyna qajet jaǵdaıdyń bári bar. Keldiń, tynyqtyń, jattyǵý jasap, jýyndyń. Ol úshin bári bar. Taǵamdary da alýan túrli. Túrli ashanalar bar. Іshinen ózińe qajettisin tańdap alýǵa bolady. Ulttyq Olımpıada komıteti de shet qalyp jatqan joq. Ár kezdegideı qosymsha tońazytqyshqa bárin uıymdastyrǵanbyz. Árdaıym ózimizben birge qosymsha tamaq alyp júremiz. Meıiz, jańǵaq, bal, sııaqty aǵzaǵa qajet ónimder bar. Azdap qazy da bar. Bul birinshi jarys emes. Sondyqtan, bizge boı úıretý úırenshikti jaıt», - dedi Ǵalymbek Kenjebaev.

Bas bapker búkil álem áńgime etip júrgen Olımpıada qalashyǵyndaǵy plastık tósekter týraly da oıyn bildirdi.

«Birinshiden, bul tósekter uıyqtaýǵa óte qolaıly. Men alǵashynda onyń karton ekenin baıqaǵan joqpyn. Keıin ǵana kórdim. Al matrasy óte jaıly», - dedi boksshylardyń bapkeri.